Куйаас күннэр сатыылаан дьон бары өрүскэ тардыһар

ГИМС инспиэктэрдэрэ куорат сөтүөлүүр сиригэр бэрэбиэркэ ыытар үлэлэрэ салҕанар. Кинилэр дьоҥҥо ууга куттала суох сылдьыы быраабылатын билиһиннэрэллэр, памятка түҥэтэллэр,  сэрэтии үлэтин ыыталлар.

Дарья Дордосова, ГИМС инспиэктэрэ: «В летний период мы ходим по местам массового скопления людей. В Якутске это 202 микрорайон, мы ведем беседы с населением, говорим о том, что нужно соблюдать правила безопасности на воде».

Куорат олохтооҕо Елена Никанорова оҕолорун кытта куорат пляһыгар аан бастакытын кэлбит. Пляж тупсубутун саҥа көрөн наһаа үчүгэй буолбут сынньанарга уонна биллэн турар ууттан сэрэхтээх буолуу ирдэбиллэрин умнубаппыт диэн этэр.

Елена Никанорова, Дьокуускай олохтооҕо: «Кыра оҕобунан бэйэбит сылдьабыт чугастыы, оҕолорбутун көрө сылдьабыт. Бары бииргэ киирэбит, бэйэлэрин ыыппаппын».

Дьон куттала суох сынньанарыгар тустаах усулуобуйа баар, быыһааччылар күн устата дьуһуурустубалыыллар, сэрэтии үлэтин ыыталлар

Владислав Васильев, быыһааччы: «Саамай сүрүнэ бу буйкалартан  тахсыа суохтарын наада уонна сэлиэттээх сылдьыахтарын наада. Бу сааптыыр сэлиэтэ суох көҥүллэммэт».

Дьон сөрүүкээри дьиэ кэргэнинэн, оҕолорун кытта көхтөөхтүк кэлэллэр. Сайыммыт бэйэтэ да кылгас. Онон дьон күҥҥэ сыламнаан, загардаан, дуоһуйар-сынньанар. Уус Алдан улууһун олохтооҕо Евдокия Алексеева сиэннэрин кытта кэлбит.

Евдокия Алексеева, Уус Алдан улууһун олохтооҕо: «Ууттан сэрэхтээх, ол иһин кэтии-маныы сылдьабыт, ыраах барбатыннар диэн көрөбүт, истэллэр, үөрэтэбит».

Киин куорат ууллуох итиитэ. Дьон бары күлүк сири былдьаһар. Маннык сырылатар куйааска ким тымныы утах, мороженай сиэн, ким сөтүөлээн, ким көннөрү дьиэҕэ олорон быыһанар. Дьокуускай пляһа бэс ыйын саҥатыттан арыллан үлэлиир.

Виктор Обутов, техническэй хааччыйыы сулууспатын салайааччы: «Сыалбыт-сорукпут куттал суох буолуута. Дьон сөтүөлээн, сынньанан бириэмэлэрин атаардыннар диэн миэстэ оҥоруохтаахпыт».

Сөтүөҕэ анамматах көҥүллэммэтэх сирдэргэ сылдьыы, итирик туруктаах сылдьан сөтүөлээһин, оҕолору көрүүтэ суох хаалларыы алдьархай тахсар сүрүн төрүөттэринэн буолаллар.

Татьяна Николаева: «Итиигэ сүрэх ыарыылаахтарга, дабылыанньалаахтарга, саастаах дьоҥҥо, кыһыл оҕолорго, хат дьахталларга ордук ыарахан. Нэһилиэнньэ ортотугар маннык итии күннэргэ инфарктааһын, дабылыанньа үрдээһинэ эбиллэр. Онон итииттэн, күнтэн хайаан да харыстанар наада».

Бу күннэргэ Саха сирин үгүс улуустарыгар бэрт куйаас күннэр туруохтара, салгын температурата 35 кыраадыска диэри тахсыаҕа, онтон сорохторго, этиҥнээх ардах, тыаллаах күн-дьыл турара сабаҕаланар.