Дьокуускайга "Саха сирин Раритета: Амма улууһа" диэн ааттаах быыстапка арыллынна

"Саха сирин Раритета - Амма улууһа". Өссө биир ураты, дириҥ ис хоһоонноох быыстапка түмэлгэ турда. Бу национальнай ойулуур  - дьүһүннүүр түмэл 2011 сыллаахтан ыытар бырайыага. Амма улууһа 17-с буолар. Түмэл үлэһиттэрэ, учуонайдар улууска тахсан 2,5 сыл кэриҥэ чинчийии, үөрэтии үлэтин ыыппыттара.

Ньургуйаана Илларионова, искусство билимин кандидата, быыстапка тэрийээччитэ: «Бу бырайыагы төрөтөн таһаарбыт дьоннора Ася Львовна Габышеваны кытары Галина Гавриловна Неустроеваны кытары кэпсэтэн бараммыт биһиги мусуойдарбыт өр сылларга бэйэлэригэр илдьэ сылдьыбыт бары экспонаттарын барытын туох баар үтүөлэрин, туох баар мааны экспонаттарын таһаараннар көрдөрөллөр».

Бу сыралаах үлэ түмүгэ быыстапка уонна саҥа альбом кинигэ сүрэхтэниитэ буолла. Кинигэҕэ барыта 800-тэн тахса матырыйаал киирдэ, оттон быыстапкаҕа 200-тэн тахса экспонат көрдөрүүгэ турда.

Роман Алексеев, Амма улууһун тимир уустарын түмсүүтүн салайааччыта: «Биһиги улууспут култуурунай баайын-дуолун уонна дьоно-сэргэтэ илдьэ сылдьар баайдара буоллаҕа. Бу барыта мусуойдарга эрэ буолбакка чааһынай кэллиэксийэҕэ, оскуолалар мусуойдарыгар тураллар. Үйэтитэн кинигэҕэ киирбитигэр аналлаах быыстапка».

Быыстапка биир ураты экспоната былыргы тимир ууһун сатабылын көрдөрө - кылыс буолар. Бу кылыс 15-16 - с үйэлэргэ туттулла сылдьыбыт, олохтоохтор сир хоруттара сылдьан 1971 сыллаахха Чакыр нэһилигин Күбэйэ сириттэн булбуттар.

Вера Бессонова, В.Г. Короленко аатынан Амма 1 №-дээх оскуолатын кыраайы үөрэтэр түмэлин салайааччыта: «Маны Наахаралар уонна Бөрө-Бөтүҥнэр саха аҕа ууһунан кыргыһар кэмигэр туттубут сэриилэрин сэбэ буолар. 1971 сылтан бу экспонат Короленко аатынан 1 №-дээх орто оскуола киэн туттуута».

Бу бырайыак, быыстапка Саха төрүт үгэһин, култууратын үйэтитиигэ, култуурнай нэһилиэстибэни инники көлүөнэҕэ тиэрдэр уонна харыстаан халларыыга сүдү, улахан хардыы буолар.

Александра Неустроева, П.П.Романов аатынан Дьокуускайдааҕы художественнай училище салайааччыта: «Сахабыт сиригир бүгүҥҥү күннээххэ сахабыт сирин улуустарбытыгар историябытын көрдөрөр. Матырыйаалынай култуурабытын, уустар, уран тарбахтаахтар оҥорон хаалларбыт оҥоһуктарбыт кинигэҕэ киирэн үйэтитиллэр».

Ураты, дириҥ ис хоһоонноох быыстапка национальнай ойулуур - дьүһүннүүр түмэлгэ балаҕан ыйыгар диэри туруоҕа. Онон, олохтохтору, ыалдьыттары кэлэн көрөргүтүгэр, кэрэхсииргитигэр ыҥыраллар.