Саха тыйаатыра саҥа туруорууга бэлэмнэнэр

Саха тыйаатыра быйылгы сезоҥҥа биир саамай улахан уонна кэтэһиилээх саҥа испиктээкили көрөөччүлэргэ бэлэмниир. Саха норуодунай суруйааччыта Николай Лугинов айымньытыгар олоҕуран "Түүл уҥуор кытыла" диэн ааттаах дириҥ ис хоһоонноох испиктээкили режиссёр Андрей Борисов туруорда.

Андрей Борисов, режиссёр: "Мин көрдөхпүнэ, аан дойду олоҕор, кырдьык да, сюрреализм киирдэ. Олохпут киһи көһүппэтэх өттүттэн түөрэ-лаҥкы бара турар. Кэнники 30 сылга хайдах эмэ гынан түргэнник байбыт киһи диэн философия, үлэлээбэккэ, бэйэ талаанын туһаммакка байа охсубут киһи диэн санаа наһаа күүһүрдэ. Онон бу испиктээкил ити кыһалҕаны эмиэ көтөҕөр".

Сүрүн оруолу Пётр Домотов оонньуур. Артыыс кыраныыссаҕа сулууспалаан кэлбит У Синь, Олоҕун уларытаары, куораттааҕы атыы-эргиэн киинигэр кырдьаҕас оҥочоһукка эрдииһитинэн үлэҕэ киирэр. Улахан куорат күлүмнүүр уота, баайга-дуолга тардыһыы эдэр уол өйө-санаата уларыйар.

Пётр Домотов, П.А. Ойуунускай аатынан Саха тыйаатырын артыыһа: "Бастакы улахан оруолум. Онон долгуйабын. Сүрдээҕин кыһаллан туран үлэлии сылдьабын. Уобараһым кыра-хара, хара буорга улааппыт уол туһунан. Кылгастык эттэххэ, байыан баҕарар. Ол туһунан".

Бу испиктээкил түүл уонна илэ икки ардыгар хаайтарбыт киһи олох чахчытын көрдүүрүн туһунан. Онон көрөөччүлэргэ интэриэһинэй, ону тэҥэ олоҕу толкуйдатар испиэктээкил буолуоҕа диэн артыыстар эрэнэллэр. Манна Саха тыйаатырын бары көлүөнэ артыыстара хабыллан оонньууллар.

Василий Борисов, П.А. Ойуунускай аатынан Саха тыйаатырын артыыһа: "Олохпут түүл дуу илэ дуу. Бу өйдөбүлү биэрэр испиктээкил. Олорор олохпут түүл дуу, түүлбүт дьиҥ олох дуу. Бу туһунан толкуйдатар туруоруу".

Билигин репетиция тохтообокко ыытыллар.  Артыыстар көстүүмнэрэ, уот -күөс барыта бэлэм. Саҥа испиктээкил сүрэхтэнэрэ нэдиэлэ эрэ хаалла. От ыйын 10, 11 уонна 12 күннэригэр тыйаатыр улахан саалатыгар көстүөҕэ.