Анал байыаннай дьайыыга көмө тиһигин быспат

Амарах санаалаах волонтердар тиһигин быспакка аадырыстаах баһыылкалары бэрийэллэр. Бу сырыыга госпитальга баттыктары, кэлээскэлэри ыытаары бэлэмнииллэр. Маннык көмөнү нэһилиэнньэ оҥорор. Анал байыаннай эпэрээссийэ саҕаланыаҕыттан байыастары өйүөн баҕалаахтар күннэтэ кэлэ тураллар.

Владимир Саморцев,  "Саха сирэ эйигин кытары" волонтер хамсааһынын кыттыылааҕа: "Бүгүн сарсыарда аҕалан туттарбыттара. Амарах санаалаах дьон куоракка элбэхтэр, улуустан да кэлээччилэр элбэхтэр. Бу Ростовка госпитальга барыахтааҕы бэлэмниибит". 

Бу дьоҕус хос иһигэр хомуллан, таҥыллан сырыы аайы, ыйга иккилиитэ, 800 киилэттэн итэҕэһэ суох көмө барар. Баһыылка араас буолар, холобур, бу Аллараа Хыматтан түөрт куул харыстыыр сиэккэ кэлэн турар. 

Валентина Дмитриева, "Саха сирэ эйигин кытары" волонтер хамсааһынын кыттыылааҕа: "Баһыылкабыт араас буолар. Байыастарга анаан аһылык, эмп хомуйабыт, маны барытын госпитальга ыытабыт".  

Анал байыаннай дьайыыга Саха сирин волонтердара  уопсайа 159 туонна көмөнү ыыппыттар. Итини таһынан киэҥ хабааннаах үлэ байыастар таҥастарын тигиигэ барар. "Саха сирэ эйигин кытары" волонтер хамсааһынын штабыгар промышленнай таһымнаах  тигии сыаҕа үлэлиир. Манна иистэнньэҥнэр бары сүрэх баҕатынан  бу дьыалаҕа кыттыһаллар.

Инна Максимова, "Саха сирэ эйигин кытары" волонтер хамсааһынын кыттыылааҕа: "Сайыҥҥы сиэккэ көстүүмнэри тигэ сылдьабыт. Ону таһынан тус сакааһынан тигэбит. Холобур ааспыт нэдиэлэҕэ 30 устуука бүрүнэр таҥас тигэн ыыппыппыт".  

"Саха сирэ эйигин кытары" волонтер хамсааһына 3 сүрүн хайысханы тутуһар - иис, сиэккэ өрүү уонна көмөнү хомуйуу.  Амарах сүрэхтээхтэри биир санаа түмэр - оҕолоругар, чугас дьонноругар, байыастарга көмө.

Светлана Поскачина,  "Саха сирэ эйигин кытары" волонтер хамсааһынын кыттыылааҕа: "Уолум билигин да сэриигэ сылдьар, сиэним 2 группалаах инбэлиит буолан кэлбитэ. Уолум бу сиэккэлэр олус туһалаахтар, онон өрүүгэ кыттыс, сырыт диир".  

Амарах санаалаахтары байыастар махтал тыллара, хас биирдии быыһаммыт олох кынаттыыр. Ити курдук биир да күн көмөнү оҥоруу тохтообот.

Анна Ефимова,  "Саха сирэ эйигин кытары" волонтер хамсааһынын салайааччы: "Улахан кээмэйдээх көмө Аллараа Халыматтан кэллэ уонна госпитальга. Бу таһаҕаһы от ыйын саҥата ыытыахпыт".  

Сайын буолан харыстыыр сиэккэни өрүүгэ кыттыһааччылар аҕыйаабыттар. Онон баҕалаахтары көмөҕө ыҥыраллар.