Ефимов аатынан уулуссаҕа от ыйыттан аспаал ууран саҕалыахтара

Ойуунускай аатынан уулусса капитальнай өрөмүөнэ салҕанар. Манна хас даҕаны улахан тиэхиньикэ күннэтэ үлэлиир. Ким буор таһар, ким тэҥниир. Бу суолу Дежнев уулуссатыттан Октябрьскайга диэри барар учаастагын  оҥороллор, уопсайа 2 килэмиэтир усталаах.  Бэдэрээччитинэн "Дороги Саха" тэрилтэ буолар.

"Быйыл Дьокуускай үрдүнэн “Олоххо-дьаһахха аналлаах инфраструктура” диэн национальнай бырайыак чэрчитинэн уопсайа 8 суол өрөмүөннэнэр. Бу Ойуунускай аатынан уулуссаҕа үлэ ааспыт сылтан барар. Быйыл муус устартан саҕалаан Дежнев уулуссатыттан Отябрьскайга диэри суол-иис хааччахтанан турар. Билигин аспаал кутаары суолу бэлэмнии сылдьаллар", - Татьяна Николаева, корреспондент.

Манна айан-сырыы хааччахтамматын туһуттан, суолу бүтүүннүү саппакка үлэлэри түһүмэхтэринэн ыыталлар. Ыам ыйыттан Петровскай уулуссатыттан Октябрьскайга диэри учаастагы сабан тураллар. Бүгүн, сарсын бу учаастак аҥаарын арыйан айан-сырыы сөргүтүллүөҕэ. Мантан сайын үлэ өссө да элбэх.

Айгылаан Григорьев, өрөмүөннэнэр учаастак салайааччыта: "Билигин биүиэхэ былааҥҥа Петровскай уулссаттан Каландаришвилига диэри иккис балаһабытын аспааллааһын. Ону аныгыскы ый саҥата саҕалыахпыт. Ону таһынан Петровскай уулуссаттан Октябрьскайга диэри щебенка кутуллар".

Дьокуускай үрдүнэн уопсайа 7 килэмиэтир уһуннаах суол оҥоһуллуоҕа. Онтон 400-тэн тахса миэтэрэтэ саҥа суол, уоннааҕыта баар уулуссалары төрдүттэн саҥардаллар. Олох саҥа суолунан бу 203 түөлбэҕэ Ефимов аатынан уулусса буолар. Ефимов уулуссата капитальнай өрөмүөннэнэн айаан-сырыы тупсуоҕа. Суол икки балаһалаах буолар. Күн ахсын үлэ көхтөөхтүк барар, билигин суол кытыытын  сиэмэнин кута сылдьаллар. Бу эбийиэккэ суол үлэлэрин "РИК Автодор" тэрилтэ сүрүннүүр.

Александр Алексеев,"РИК Автодор" тэрилтэ суол өрөмүөнүгэр учаастагын салайааччы: "Ефимов аатынан уулусса биһиэхэ саҥаттан оҥоруу буолар. Уопсай устата 390 миэтэрэ уһуннаах. Оттон суол быһа охсуһуута хапытаалынай өрөмүөн. Бу үлэлэр тус туһунан хантараактар. Аспаал үлэтэ от ыйыттан саҕаланыаҕа".

Ефимов, Ярославскай-Хабаров уулуссалар силбэһиилэрэ эмиэ оҥоһуллуоҕа. Манна 4 балаһалаах эргииргэ светофорунан салаллар хамсааһын биир кэлим буолан толору оҥоһуллуохтаах. Өрөспүүбүлүкэ үрдүнэн быйыл уонтан тахса улууска 70 килэмиэтиртэн тахса  усталаах суол-иис оҥоһулла турар.