“Дыгын оонньуулара” үгүс чаҕылхай киирсиилэри бэлэхтээтэ

Үөрүү өрөгөйө., дьол чыпчаала. Бу курдук "Дыгын оонньууларын” муҥуутур кыайыылааҕын Артем Дьяконову тус хамаандата уруйдуур. 4 сыл сыралаах үлэ, дьэ үтүө түмүктэри аҕалла. Кэбээйи улууһун Лүксүгүнүн уола, 22 эрэ сааьыгар өрспүүбүлүкэ биир саамай тутаах, суолталаах күрэҕин кыайыылаҕынан буолла.

Артём Дьяконов, "Дыгын оонньуулара - 2026" кыайыылааҕа: «Буолуор диэри, бэс ыйын 26 күнүгэр диэри, кыайыам диэн итэҕэйбэт этим. Күрэхтэспэтэҕим 6 ый буолбута, онон хайдах турукка сылдьарбын билбэт этим. Онтон күрэх буолар күнүгэр бэйэбин сааһыланаммын биирдэ тоҕо түһэн кээһиэм диэн сыал-сорук туруоруммутум».

Үс Хатыҥ ытык сиригэр 31 төгүлүн ыытыллар "Дыгын оонньуулара" үрдүк таһымҥа, тыҥааһыннаахтык ааста. Икки күн устата 16 саха төрүт күрэҕин бөҕөстөрө бастыыр иһин илин-кэлин түһүстүлэр. Быйыл биирис пуондата 19 мөллүйүөҥҥэ тэҥнэстэ, онон быраабыла чааһыгар үгүс суолталаах уларыйыылар киирбиттэр.

Иван Горохов, күрэх сүрүн судьуйата: «Улахан уларыйыы күрэхтэһээччилэр бэйэ бодолорун көрүнүүлэригэр киирдэ, инники бу ирдэбил суоҕа. Спортсмен бу ирдэбили кэһэр түгэнигэр кыһыл, араҕас карточкалары биэрэр буоллубут. Кыһылы ылбыт күрэхтэһииттэн туоруур. Улахан спортка курдук. Бу ирдэбил бэрэстэбиитэлгэ уонна тренергэ эмиэ туттуллар. Ити таһынан оххо уларыйыы киирдэ, инники 6 төгүл ытар буоллахтарына билигин 12 төгүл ытар буоллулар».

Үгэскэ кубулуйан Ус Хатыҥ биир бас түһүлгэтэ саха төрүт спордун сэҥээрээччилэрин тыһыынчанан киһини түмтэ. Спорт бырааһынньыга үгүс ааттаах-суоллаах күрэхтэһээччилэри, спорт бэтэрээннэрин сомоҕолоото. Онтон "Дыгын оонньуулара" бастаан "Уруҥ уолан" диэн ааттаанан ыытылларын,  күрэх саамай бастакы кыайыылааҕа Иннокентий Макаров  ахтар.

Иннокентий Макаров, спорт бэтэрээнэ, күрэх бастакы кыайыылааҕа: «Урут бастакы көрүҥ “Аман өс” диэн этэ, бэйэни билиһиннэрии. Мин онно үксүн бастыыр этим, уус-уран сахалыы тыллары туһанар буоламмын. Билигин ону сөргүтэллэрэ буоллар дии саныыбын».

Онтон 2 кун тыҥааһыннаах киирсиилэр түмүктэринэн икки Кэбээйи уолаттара кыайыы бастакы, иккис үктэллэригэр таҕыстылар. Кэбээйи кынаттаах кылыыһыта Яков Дмитриев 2 бочуоттааах миэстэни ылары ситистэ.

Яков Дмитриев,  "Дыгын оонньуулара - 2026" күрэхтэһии 2 миэстэ кыайыылааҕа: «Иккис буолбуппуттан үөрдүм да хомойдум да. Иккистээбитим эһиил кэлэрбэр өссө дьулуур биэрэр. Үчүгэй күрэх буолла, утарсааччылар эбиллибиттэр, элбэх тыҥааһыннаах киирсиилэр буоллулар».

Саха дьоно саамай көһүтэр, күүтүлээх күрэҕэ түмүктэннэ. Аны  эһиилги түһүлгэни кэтэһэбит.