Саха сиригэр оҥоһуллубатах уустук эпэрээссийэни саха хирургтара оҥордулар

Олохтоох хирургтар уопуттаах үөлээннэхтэрин хас биирдии хамсаныытын болҕойон көрөллөр. Саха сиригэр хаһан да ыытыллыбатах эпэрээссийэ, дьахтар эмиийин бэйэтин иһин тириититтэн уонна сыатыттан оҥороллор. Бу олус уустук эпэрээссийэ, наадалаах кээмэйи киһиттэн бэйэтиттэн  ылан баран, аны тымырдарын холбууллар.

Владимир Васильев, СӨ онкологическай диспансерын түөс уонна тирии искэҥин эмтиир салаа сэбиэдиссэйэ: "Кэмпириэнсийэ иһинэн маастар кылааска Герцен аатынан Онкология институтуттан Азиз Зикиряходжаев бэйэтин хамаандатын кытта ыалдьыттыы сылдьар. Эпэрээсийэлэнээччи эмиий раага диэн диагнозтаах. 7 сыллааҕыта түөһүн быстарбыт".

Түөс искэҥин ылларыы кэннэ дьахтар киһи уйулҕата уонна айылҕатын быһыытынан охсуута кыра буоллун диэн онкологическай киин хурургтара пластическай хайысханы баһылыыллар. Онон бу маастар кылаас кинилэргэ улахан хардыыны оҥоруо.

"Бу маннык дьахтар түөһүгэр уустук эпэрээссийэни олохтоох хирургтар маастар кылаас кэннэ бэйэлэрэ оҥоруохтара. Маныаха оборуудабанньа да хирургтар таһымнара да эппиэттиир", - Мария Дмитриева, корреспондент.

Кэмпириэнсийэ чэрчитинэн икки уустук эпэрээссийэни тэрээһин кыттыылаахтарыгар көрдөрөллөр. Хирург Владимир Лезнев  хас биирдии хамсаныытын сиһилии кэпсиирин быһа сибээскэ көрө олороллор.

Ити курдук  саалаҕа бүөргэ үөскээбит искэҥи ылыыга Саха сирин бастыҥ хирургтара үлэлииллэр. Түөрт сиринэн киирэн, бу курдук экран нөҥүө көрөн туран эпэрээссийэлииллэр.  Маннык ньыма малоинвазивнай диэн ааттанар.

Дмитрий Пестерев, СӨ онкологическай диспансерын анестезиолог бырааһа: "Бүөрүгэр искэҥ тахсыбыт. Искэҥин ылабыт итиэннэ бүөрү бэйэтин хаалларабыт. Бүөр олус суолталаах, ол иһин саатар аҥаарын хаалларыахха диэн соруктаахпыт".

Онкологическай киин 2024 сыллаахха олоххо киирбитэ. Бу кэмтэн ыла искэҥи эмтээһин, чуолаан хирургия салаатыгар, таһым биллэ үрдээтэ. Күҥҥэ 20 эпэрээссийэҕэ тиийэ оҥороллор.

Татьяна Николаева, СӨ онкологическай диспансерын кылаабынай бырааһа: "Урут биһиги өрөспүүбүлүкэбитигэр оҥоһуллубат эпэрээссийэлэр билигин судургутук оҥоһуллар буоллулар. Күн бүгүн ыарыһах 80-90% эпэрээссийэлиир кыахтаахпыт".

Быйыл искэҥинэн ыалдьар дьон 2024 сылы кытары холоон көрдөххө 1,3% аччаабыт, ол эрэн уопсайа 5 сыл иһигэр 15,8 % үрдээбитэ бэлиэтэнэр.