Хаһаайыстабылар окко бэлэмнэнэллэр

Хаҥалас улууһун Хачыкаат нэһилиэгин хаһаайыстыбатын механизатор-биригэдьиирэ Дамир Дмитриев үлэлээбитэ 4 сыла. Бу "Бастыҥ механизатор" идэ күрэҕин регионнааҕы түһүмэҕэр кытта сылдьар. Манна кыттааччылар тыраахтырга үлэлиир бары үөрүйэхтэрин тургуталлар. Ол курдук пресстыыр тэрили холбооһун, мотуору ыһыы-хомуйуу, компьютерынан навигацияны оҥоруу, өрөмүөннээһин үлэтэ киирэр. 

Дамир Дмитриев,  "Хачыкаат" ТХПК мехнизатор-биригэдьиир: "Үлээбитим 4 сыл буолла. Оҕо эрдэхпиттэн тиэхиньикэ өттүгэр охтор этим. Ол иһин бу хайысхаҕа барбытым". 

Окко киириэх иннинэ хаһаайыстыба үлэһиттэрэ тиэхиникэни билиилэрин көрдөрөллөр. Быйыл 3 кыттааччы бастыҥ механизатор үрдүк ааты ылар иһин күрэхтэһэр. Экспердэр 4 муодул тус-туспа ирдэбиллэринэн сыаналыыллар.

Николай Александров, АГАТУ инжнернай факультетын декана: "Бу турар МТЗ-1225 мотуору ыһыахтаахтар. Төһө бэрээдэгин тутуһалларын, буолтаны эрийии нуорматын туһууну кытта көрөбүт".  

Манна кыайбыт тырахтарыыс финалга Россияҕа баран кыттар чиэскэ тиксиэҕэ. Роман Куприянов "Хачыкаат" тыа хаһаайыстыбатын оҥорон таһаарар кооперативын салайааччытынан үлэлээбитэ 27 сыл буолла. Бу күрэххэ кини үлэһитэ кытта сылдьар. Хаһаайыстыба ынах-сүөһүнэн, сылгынан, ону тэҥэ бурдук ыһыытынан сүрүннээн дьарыгырар.

Роман Куприянов,  "Хачыкаат" ТХПК бэрэссэдээтэлэ: "Сүүрбэччэ хонукка 600 туоннаны оттуубут. Ол бэйэбитигэр сөп буолар. Томпо Кириэс халдьаайытыттан 200 туонна оту атыыга бэлэмниир кыахтааххын дуо диэн көрдөстүлэр".  

Саха сирин үрдүнэн үрдүнэн быйылгы от былаана былырыыҥҥыттан улаханнык уларыйбата күүтүллэр, сыллата буоларын курдук 400-тэн тахса тыһыынча туонна отунан Саха сирин сүөһүтэ кыстаан тахсар. Онно эбии сенаж, сиилэс бэлэмнэниэн наада.

Вячеслав Гаврильев, СӨ ТХМ сиртэн үүнүүнү ылыыга, сири нүөлсүтүүгэ, материальнай-техническэй хааччыйыыга департаменын салайааччы: "Былааммыт 420 тыһыынча туонна. Итини сэргэ сиилэс 29 тыһыынча туонна, сенаж 15 тыһыынча туонна кэриҥин былааннаан олоробут. Былырыын сенаж, сиилэс көрдөрүүтэ үчүгэй этэ. Быйыл биир сыллаах оппутун кэмигэр ыспыт буоламмыт үчүгэй үүнүүнү күүтэбит". 

Ыһыахтар кэннилэриттэн окко киирии тэрээһиннээхтик барыаҕа. Ол курдук тиэхиньикэ, сапчаас, сэлээркэ боппуруостарын барытын эрдэттэн быһааран оттооһун саҕаланыаҕа.