Дьокуускайга дойду суруналыыстара кэлэн национальнай бырайыактар олоххо киириилэрин сырдатыахтара

Бастакы күн ыалдьыттарга Саха сирин күндү баайын быыстапкатын көрдөрдүлэр. Манна кыһыл, үрүҥ көмүстэртэн, күндү таастартан оҥоһуллубут ювелирнай киэргэллэр, ураты оҥоһуктар хараллан тураллар. Бу сырыыга быыстапка бэлиэ экспонатынан Арктикатааҕы култуура, искусство уонна креативнай индустрия устудьуоннарын айымньылара буоллулар. 

Никита Васильев, Арктикатааҕы култуура, искусство уонна креативнай индустрия университетын преподавателэ: «Оҕолорбут талааннахтарын билинэн, бу үлэлэрэ Гохран России историческай мусуойга баран бастаан уонна Калининградка эмиэ бастаан, араас быыстапкаларга бастаан кэлбиттэрэ. Оҕолорбунан киэн туттабын. Ханна да бардахпытына үлэлэрбитин сөҕө көрөллөр».

Сүрүн болҕомтону биллэн турар Саха сирин киэн туттуута- алмаас таас эгэлгэтэ ылла. Быыстапакаҕа араас сылларга хостоммут ураты бэйэлээх сүүнэ улахан алмаас таастар кэчигирэспиттэрин кэлбит киһи бары сөхтө-махтайда. Ону тэҥэ олохтоох маастардар ураты бэйэлээх оҥоһуктара өрөспүүбүлүкэ тарбаҕар талааннаах дьонунан баайын туоһулуур.  

«Якутия — территория роста» диэн федеральнай тур чэрчитинэн нэдиэлэ устата дойду суруналыыстарыгар өрөспүүбүлүкэ олоҕун-дьаһаҕын, сүрүн тутуулары, эбийиэктэри билиһиннэриэхтэрэ. Биллэн турар Саха сирин баай култуурата эмиэ туора хаалбат. Дойду суруналыыстара Туймаада ыһыаҕар эмиэ сылдьыахтара.

Андрей Захаров, СӨ күндү баайын быыстапкатын сэбиэдиссэйэ: «Дьоннор сөҕөллөр хайдах маннык талааннаах оҕолордооххутуй диэн. Биһи быһааран биэрэбит – биһиэхэ хас даҕаны Сахабыт сирин үрдүнэн анал худуоһунньуктары, ювелирдары бэлэмниир үөрэх кыһалара бааллар».

Федеральнай пресс-туур сүрүн сыала Уһук Илиҥҥэ, чуолаан Саха сиригэр национальнай бырайыактар олоххо киириилэрин сырдатыы буолар. Ол курдук бөдөҥ тутуулары, үлэҕэ киириэхтээх эбийиэктэри, тыа хаһаайыстабытын, оҥорон таһаарыыны суруналыыстарга көрдөрүөхтэрэ.