"Бэс чагда" сайыҥҥы чэбдигирдэр лааҕырга "Кэскиллээх Дипломаттар" саҥа смена үлэтин саҕалаата

"Бэс чагда" оҕону сайыннарар уонна чэбдигирдэр киин Өрөспүүбүлүкэҕэ саамай улахан лааҕырынан биллэр. Лааҕыр бастакы сезонун түмүктээн, аны иккиһэ саҕаланна. Бу ураты смена буолар, манна Саха сириттэн, Дойду 15 регионуттан уонна Кытайтан, барыта 180-тан тахса оҕо сынньана кэллэ.

Варвара Васильева, "Сосновой бор" оҕону сайыннарар уонна чэбдигирдэр киин дириэктэрэ: «Биһи сменабыт “Дипломаты будущего” диэн. Оҕолор хайдах бэйэ бэйэлэрин кытта кэпсэтиэхтээхтэрин, алтыһыахтаахтарын, үөрэниэхтээхэтэрин. Дипломат диэн олох интриэһинэй идэ. Тыллары, традициялары, хайдах кэпсэтэри билиэхтээхтэр».

Оҕолор саҥа көтөн, айаннаан кэлэн хомуна сылдьаллар. Сорох оҕолор Саха сиригэр уонна лааҕырга аан бастакытын кэлбит буолан, кинилэргэ барыта саҥа уонна долгутулаах. Хас биирдии кэлбит оҕону баһаатайдар көрсөллөр, ыйан-кэрдэн биэрэллэр. Уопсайа бу сменаҕа, 15 баһаатай үлэлиэҕэ. 

Афанасий Канаев, баһаатай: «Олус элбэҕи күүтэбит. Бэйэм баһаатай быһыытынан этэбин, оҕолору көрөммүн наһаа үөрдүм, оҕолору кытта үлэлиир олус атын эйгэ буолар. Бу смена “Международные интеллектуальные игры” партнера буолар. Манна үөрэнэллэр, профориентация ааһаллар».

Бүлүү улууһуттан сылдьар Родион Новиков саҥа айаннаан кэлээт, хоһун, таҥаһын бэрийэр. Сарсыҥҥыттан үөрэхпит, дьарыкпыт саҕаланар. Элбэх доҕоттордонуом, саҥаны билиэм, сайдыам диэн этэр. Үөрэх таһынан, оҕолор араас тэрээһиннэргэ кыттыахтара, түмэллэргэ, эскурсияҕа сылдьыахтара. Быраграмалара киэн уонна интэриэһинэй.

Родион Новиков, Бүлүү улууһун Хампа орто оскуолатын үөрэнээччитэ: «Мин манна Кытай тылын билээри кэллим. Мин ИТ өттүгэр киириэхпин баҕарабын. Араас бырагыраама, оонньуу оҥоруохпун баҕарабын».

"Кэскиллээх Дипломаттар" саҥа смена Саха сиригэр норуоттар икки ардыларынааҕы интеллектуальнай оонньуулар чэрчитинэн үлэтин саҕалаата. Өй күрэҕэ, сүрүн сыала үөрэх, билим эйгэлэригэр бииргэ үлэлэһиини сайыннарыы, талааннаах ыччаты өйүүр сыаллаах ыытыллар. Онон, олус ураты уонна туһалаах сайын оҕолорго саҕаланна.