Оҕо эрдэхтэн байыаннай дьыалаҕа уһуйуу

Сунтаар Тойбохойуттан кэлэ сылдьар Айхал Кондратьев аан бастакытын киин куоракка маннык хабааннаах лааҕырга кэлбит. Бастакы көмө, БПЛА-ны көтүтүү, байыаннай тактика, автоматы хомуйуу-ыһыы, снайпинг онтон да атын хайысхаларга манна үөрэтиилэри кини ааһа сылдьар.

Айхал Кондратьев, лааҕыр иитиллээччитэ: «Барыта үчүгэй, физподготовка, инструктордар бэркэ үөрэтэллэр».

"ВОИН" патриотическай киин сыллата "Энергетик" лааҕырга "Буойун суола" диэн ааттаах сменатын арыйар. Манна өрөспүүбүлкэ араас муннугуттан оҕо бөҕө кэлэн патроитическай иитиини, олох оскуолатыгар буһаллар- хаталлар.

Айсен Иванов, "ВОИН" киин сүрүн инструктора: «Тактическай подготовка буола турар. Ону таһынан БПЛА салайыыта баар, тактическай мэдиссиинэ буола турар, ытыы уонна снайпинг баар бырагыраамабытынан. Бастакы сезоҥҥа оҕолор сүрүн баазатын бараллар. Онтон иккискэ быдан дириҥ үөрэтии буолар».

Холбура, бу сменаҕа 80-тан тахса уол уонна 100-тэн тахса кыыс оҕо лааҕырга сылдьаллар. Кыргыттар оннооҕор уолаттары баһыйаллар диэн инструктордар кэпсииллэр. Томпо улууһун Мэҥэ Алдан орто оскуолатын 8 кылааһын үөрэнээччитэ Ыракыева Кюннэй номнуо БПЛА-ны баһылаан эрэр.

Кюннэй Ыракыева, лааҕыр иитиллээччитэ: «Манан салайаҕын, камеранан көрөҕүн, хаартыска, видео устуохха сөп».

Манна барыта анал байаннай дьайыыга сылдьыбыт, бу дьыаланы ис иһиттэн билэр дьон үлэлии сылдьаллар. Онон үөрэтиилэр дьиҥ улахан дьоҥҥо ыытыллар курдук ааһаллар. Оҕолор бары этэрээттэринэн хайдыһан, дьиэлэргэ олороллор. Күҥҥэ 5 аһыыллар диэн лааҕыр салайааччыта иһитиннэрэр.

Любовь Павлова, "Энергетик" лааҕыр салайааччыта: «Үчүгэйдик аһаталлар, остолобуой үлэлии турар. Сарсыардааҥҥы куруһуоктар бааллар кыраларга, улахаттарга инструктордар дьарык ыыталлар. Күнүс "ВОИН" киин кэлэн тэрээһиннэри ыытар. Биһи баһаатайдар киэһээҥҥи тэрээһиннэри ыытабыт».

Онтон тустаах хайысхалаах смена бэс ыйын 30 күнүгэр диэри ыытыллыаҕа. Ол кэнниттэн салгыы атын оҕолор эмиэ үөрэнэ-сынньана кэлиэхтэрэ.