Өрөспүүбүлүкэтээҕи СПИД-Киин үлэһиттэрэ дьон сынньанар сирдэригэр босхо анализтары тутан саҕалаата

Дьокуускай олохтооҕо Людмила Туманова пляжка сөтүөлүү кэлэн баран босхо анализ ылалларын көрөн туттарарга санаммыт. Сыллата маннык түргэн тестирование ааксыйатыгар хайаан да кыттабын диэн этэр, тоҕо диэтэр доруобуйа туругун бэрэбиэркэлэтэр хайаан да наада диэн санаалаах.

Людмила Туманова, Дьокуускай олохтооҕо: «Наадалаах бөҕө буо, маннык түбэһэбин. Хас эрэ сыллаахха Доҕордоһуу болуоссатыгар тураллар этэ уонна Хомсомуол болуоссатыгар эмиэ турар этилэр. Туттарбытым, үчүгэй баҕайы ааһан иһэн туттарар».

Спид уонна инфекционнай ыарыылары сэрэтэр уонна утары охсуһар өрөспүүбүлүкэтээҕи киин нэһилиэнньэҕэ өйдөтүү үлэтин көхтөөхтүк ыытар. Бу сырыыга куорат сөтүөлүүр сиригэр кутталлаах 5 инфекционнай ыарыыга анализтары босхо тутар аахсыйаны тэрийдэ.

Айна Домотова, СӨ СПИД киин профилактикаҕа салаатын сэбиэдиссэйэ: «Тарбахтан анаалыс ылабыт. Саҥардыы саҕалаатыбыт манна, бу иннинэ пааркаҕа уонна Орджоникидзе болуоссатыгар. Дьон интириэһиргиир. Чаас иһигэр 30 тахса киһи туттарда».

Биирдии биирдии дьон кэлитэлээн анаалыс туттарар. В уонна С гепатит хроническай ыарыы быһыытынан сайдаллар уонна быар раагын, цирроһун сүрүн төрүөтүнэн буолаллар. Өрөспүүбүлүкэ үрдүнэн уон тыһыынчаттан тахса киһи учуокка турар.

Снежана Слепцова, СӨ доруобуйа харыстабылын министиэристибэтин сүрүн инфекционист бырааһа: «Бүгүн өрөспүүбүлүкэҕэ национальнай бырайыак буола турар “Продолжительная активная жизнь” диэн. Бу 4 сыл устата биһиги 3 тыһ. тахса киһини гепатит С-тан эмтээтибит. Хас биирдии гепатит С-таах киһи бүгүн босхо эмтэнэр. Куоракка да, тыаҕа да олордун».

Оттон ВИЧ — киһи иммуннай систиэмэтин айгыратар вирус. Бу вирус атын сыстыганнаах ыарыылар сайдалларыгар тириэрдиэн сөп. Онон хас биирдии киһи эрдэтинэ ВИЧ статуһун билэ сылдьара булгуччулаах. Оттон сэллигинэн ыалдьыы көрдөрүүтэ  кэнники сылларга өрөспүүбүлүкэ үрдүнэн  аччаабыта бэлиэтэнэр.

Розалия Антонова, СӨ СПИД киин фельдшера: «Биһиги сайыны быһа дьон сылдьар сиригэр турабыт. Биһиги балааккабытын көрдөххүтүнэ кэлэн босхо анаалыс туттарыаххытын сөп».

Анаалыс түмүгүн 10-15 мүнүүтэнэн номнуо билиэххэ сөп. Ону тэҥэ "Госуслуги" порталыгар түмүгү эмиэ ыыттарар кыах баар.  Сөтүөлүүр сиргэ икки күн тураллар, салгыы куорат сынньанар пааркатыгар, Орджоникидзе болуоссатыгар үлэлиэхтэрэ.