Саха сиригэр үрдүк уонна орто үөрэхтэргэ туттарсыы саҕаланна

Бэс ыйын 20 күнүттэн орто уонна үрдүк үөрэхтэргэ тутарсыы саҕаланна. Виталий Антонович Вонгродский аатынан медиссиинэ коллеһа быйыл 10 хайысханан абитуриеннары хомуйар. Кини 11 улууһунан баар салааларыгар эмиэ үөрэххэ туттарсыы барар. Атырдьах ыйын 10 күнүгэр диэри тургутуулаах, 15 күнүгэр диэри тургутуута суох идэлэргэ докумуоннары тутуу үлэтэ барар. Манна киирэргэ 11 кылаас аттестатын, араас салааларга эбии экзээмэннэри көрөллөр.

Александра Москвитина, В.А. Вонгродский аатынан медициинэ колледжын сэкэрэтээрэ: «Лечебнай дьыала, сиэстирэ дьыала, акушерскай дьыала, лабараторнай диагностика, стоматолого-профилактическай, фармация, стоматологическай дьыала, медико-профилактическай дьыала уонна ремонт и монтаж биотехнических систем».

Быраас идэтин баһылыан баҕалаах дьон улахан аҥаара тус сыаллаах сөбүлэҥ нөҥүө киирэр. Тус сыалаах үөрэххэ сайаапканы тэрилтэлэр rabota.ru сайтка таһаараллар. Урут министиэристибэни кытары сөбүлэҥ түһэрсэр эрэ кыах баар эбит буоллаҕына, быйылгыттан чопчу тэрилтэни кытта буолла.

Силистээх Сарыадай Кунай кыыһа, үөрэххэ туттарсааччы: «Билиҥҥи эрэ олоххо буолбакка уопсайынан наһаа наадалаах. Бэйэм хас да үрдүк үөрэхтээхпин, ол да буоллар инникигэ наада диэммин таллым».

Онтон Хотугулуу Илиҥҥи федеральнай университетка быйылыгы уларыйыылартан биир кэлим түннүк үлэлээтэ. Манна үлэһиттэр абитуриеннарга баҕарар үөрэххэ сайабылыанньаны толорон ыытарга көрдөрөн биэрэллэр. Лоп-бааччы киирэллэрин туһугар араас сүбэ ама буолаллар.

Игорь Захаров, магистратураҕа туттарсааччы: «Туох да ыарахана суох. Барытын быһааран биэрдилэр. Госуслуги нөҥүө докумуоммутун ыытарга көмөлөһөн биэрдилэр».

ЕГЭ баалларыттан ураты, үрдүк үөрэх иһинэн араас хайысхалаах, сатабылы, кыаҕы, талааны  тургутуу туспа барар.

Дая Неустроева, докумуону тутар үлэһит: «Фольклордарга хомустаан, ыллаан-туойнан диэбит курдук. Уонна “литературное творчество” баар».

Үрдүк үөрэх кыһатыгар уопсайа 4120 миэстэ көрүллэн турар. Ол иһигэр араас хайысхалаах квоталаммыт миэстэлэр эмиэ киирэллэр. Холобура, анал байыаннай дьайыы кыттыылаахтара, кинилэр оҕолоро уонна кэргэннэрэ, ковид кэмигэр төрөпүтэрин сүтэрбит оҕолорго анаан тургутуута суох туттарсыы баар. Атырдьах ыйын 25 күнүгэр диэри үөрэхтэр ааннара аһаҕас.