Дьокуускайга бүтүн Арассыыйатааҕы дуобат күрэхтэһиитэ ыытыллар

Бу күннэргэ Дьокуускай куорат Арассыыйатааҕы дуобат киинэ буолла. Спорт киэҥ ыҥырыылаах түһүлгэтэ Арассыыйа Федерациятын уонна Саха Өрөспүүбүлүкэтин үтүөлээх тренерэ Николай Николаевич Кычкин сырдык кэриэһигэр ананар. Кини Саха сирин биллиилээх дуобаччыта, тренерэ, Арассыыйа спордун маастара. Өр сылларга Өрөспүүбүлүкэҕэ дуобат сайдыытыгар сүрүн кылааты киллэрбитэ.

Николай Стручков, Саха сирин дуобат федерациятын толорооччу дириэктэрэ: «Арассыыйатааҕы күрэххэ Красноярскайтан, Башкортостантан уонна Санкт-Петербургтан уонна өссө биир кыттыылаах Волгоградскай уобаластан кэлиэхтээх».

Бүтүн дойду таһымнаах күрэх биһиги Өрөспүүбүлүкэбитигэр 15 төгүлүн ыытыллар. Манна ыраахтан-чугастан кэлбит ыалдьыттары таһынан, Николай Николаевич Кычкиҥҥа уһуйуллубут спорстменнар эмиэ бааллар. 

Василий Кычкин, Николай Николаевич оҕото: «Билигин кини үөрэнээччилэрэ чемпион мира, гроссмейстердар, маастардар буолан бу күрэхтэһиигэ кэлэн киэргэтэ сылдьаллар. Кэнники өрөспүүбүлүкэбит Арассыыйаҕа киэҥник биллэр буолла».

Күрэх сүүс харахтаахха уонна нуучча дуобатыгар ыытыллар. Сүрүн турнирга иккис спортивнай разрядтан итэҕэһэ суох квалификациялаах спортсменнар киирэллэр. Уопсайа 140 тахса кыттааччы оонньуу сылдьар. Күрэхтэргэ эр дьон уонна дьахталлар, бэтэрээннэр уонна ону тэҥэ араас саастаах оҕолор кытталлар.

Вячеслав Варламов, сүрүн дьүүллээччи: «Сүүс харахтаахха 4 регионтан киһи кэлэн кытта сылдьар. 140 кыттааччы, оҕолорго 6 бөлөҕүнэн оонньуу сылдьаллар. Эр дьоннор, дьахталлар уонна бэтэрээннэр диэн бөлөхтөрүнэн оонньуу сылдьаллар».

Күрэх үөрүүлээх аһыллыыта сарсын буолуоҕа. Онтон кыайыылаахтары наҕараадалааһын, түмүгү  бэс ыйын 26 күнүгэр таһаарыахтара.