Саха сирин кэрэ сирдэригэр сурунаалыстар ыалдьыттаатылар

Пресс-турбут Уус Буотама бизонарийыттан саҕаланна. Аарыма кээмэйдээх сэлии кэминээҕи кыыллар мэччийэ сылдьалларын көрөр, кырдьык, ураты көстүү. Төһө да улахан буоллаллар эйэ дэмнээхтик үөрүнэн сылдьаллар. Бу түҥ былыргыттан төрүттээх кыыллар сир хайа баҕар муннугар сэдэхтэр. Онон интэриэс улахан, биллэн турар, турист сылдьыыта элбэх.

Егор Карпов, суруналыыс: «Есть ощущение нереальности. Они большие и первобытные. Это впечатляет».

Бизоннар төрүт дойдуларыгар, Саха сиригэр, төннүбүттэрэ быйыл оруобуна 20 сыл буолла. Бу айылҕа маанылаах кыыллара туризмы сайыннарыыга итиэннэ көрүҥү тэнитиигэ анаан иитиллэллэр.

Сергей Егоров, СӨ биологическай ресурсаларын салалтатын салайааччыта: «Быйыл 11 төбө ньирэйдээхпит. Үчүгэйдик төрөөтүлэр быйыл. Сыл аайы 10-ча төбөнү биэрэллэр».

Саха сиригэр күн бүгүн 400 тахса төбө баар. "Уус Буотама" диэн бизоннары иитэр сир "Өлүөнэ туруук хайалара" национальнай парка сиригэр-уотугар киирэр. Ураты харыстанар сиргэ кэнники сылларга туризм тэтимнээхтик сайдар.

Салгыы бу курдук мотуордаах болуоттарга олорсон Буотама үрэххэ балыктыы устабыт. Көрүөхтэн кэрэ тыытыллыбатах айылҕалаах эбэ устун айанныыбыт. Бу үрэх өлгөм бултааҕынан, балыктааҕынан аатырыан аатырар. Онон бары күөгүлүүргэ холонобут. Икки обургу сордоҥу хаптаран үөрүүбүт муҥура суох.

Бултуйан үөрэн-көтөн тукулааҥҥа айанныыбыт. Олохтоохтор бу кумах хайаны Кыһыл Элэһин диэн ааттыыллар. Тоҕо диэтэр күн киириитэ олус кыраһыабайдык кытаран көстөр. Онон манна киэһэ өттүгэр хаартыскалар олус табыллаллар диэн гид этэр.

Николай Баягантаев, гид-экскурсовод: «Өлүөнэ очуостарыгар баран иһэн сылдьан ааһаллар. Кэлиилэр да, олохтоохтор да манна сылдьалларын сөбүлүүллэр».

Ити курдук икки күннээх туурбут биллибэккэ ааста. Сахабыт сирин ытык сирдэринэн сылдьан күүс-уох эбиннибит.

Наталья Шадрина, турист: «Бизонарийга сырыттыбыт, тукулааҥҥа сырытыннараллар, Күөх хайаҕа, балыкататаллар. Манна үлэһиттэр тугу көрүөхпүн баҕарабын диэбиккин толороллор».

Былыырыын Өлүөнэ туруук хайалара национальнай паркаҕа 50 тыһыынча киһи сынньаммыта. Быйыл өссө  элбэх турист сылдьара былааннанар.