Баклан бииһин ууһа Саха сиригэр тэнийэр

Бу көстер каадырдарга баклан бииһин ууһа Кэбээйи улууһун Сангаарынан көтө сылдьарын устубуттар. Саха сиригэр суох көтөрдөр аны биһиги сирбитин буулаан эрэллэрэ экологтары уонна биологтары аймыыр. Билигин Кэбээйи улууһун экологическай кэтэбилин инспекцията бу көрүҥ көтөрдөрү аччатарга үлэни ыытар.

Андрей Петров, Кэбээйи улууһун экологическэй кэтэбил иниспиэксийэтин судаарыстыбаннай иниспиэктэрэ: «Кэбээйи инспиэксийэтэ билиҥҥи туругунан нэһилиэнньэттэн бакланы ытыалааһыҥҥа сайабылыанньа хомуйда. Бу күннэргэ көҥүллэри нэһилиэнньэҕэ тарҕатыахпыт».

Баклан - муора көтөрүн бииһигэр-ууһугар киирсэр. Уһуна 50-100 см тэҥнэһэр, кынатын сапсыныыта 80-160 см тиийэр. Ууга 10 миэтирэ дириҥҥэ диэри умсар, олус сымса, түргэн көтөр. Балыгынан эрэ аһыыр. Ол иһин бу көтөр ууһаабыт уутугар-күөлүгэр көмүс хатырыктаах симэлийиэн сөп диэн үөрэхтээхтэр этэллэр. Биһиги эҥээр баклааннар 4 сылтан бэттэх кыралаан кимэн киирэн иһэллэрин учуонайдар бигэргэтэллэр.

Михаил Охлопков, РНА Сибиирдээҕи салаатын криолитозона биологшическай кыһалҕаларын институтун салайааччыта: «Түргэн баҕайытык үөскүүр, ким да кинини сиэбэт, балыкпытын кэһэтиэ. Тоҕо диэтэргэ, Бурятиҕа үөрэппиттэрэ, арыылара барыта эстэн, ииктэрэ урин диэн кислота, барытын сиир. Арааһынай ыарыылара, паразиттара элбэх».

Чахчы, балыкка эрэ хоромньу буолбакка экологияҕа эмиэ улахан уларытыыны киллэриэн сөп диэн экологтар этэллэр. Холобура, сип-билигин Кэбээйи Сангаарыгар бу көтөрдөрү 50-ча онноҕор 100 ахсааҥҥа тиийбиттэрин олохтоохтор көрбүттэр. Ол чэрчитинэн тустаах улууска бу хайысхаҕа бултаһарга көҥүл биэрии үлэтэ барбыт. Онтон Өрөспүүбүлүкэ таһымыгар билигин чинчийии-үөрэтии ыытыллар.

Светлан Фёдоров, СӨ экологияҕа министиэристибэтин экологическай сайдыыга департаменын салайааччытын солбуйааччы: «Быйылгыттан үчүгэйдик үөрэтэн эрэбит. Научнай үлэ сакаастаабыппыт Институт биологических проблем. Анкетирование ыыта сылдьабыт саас кусчуттарга көҥүл биэрэргэ».

Бу көрүҥ көтөр элбиир түгэнигэр Саха сирин экологиятыгар улахан хорумньу тахсар кутталлааҕын үөрэхтээхтэр бигэргэтэллэр. Айманаллар.