Саҥа киин үлэлиэҕиттэн искэҥи эмтээһин уонна эрдэттэн булуу көрдөрүүтэ кыралаан тупсар

"Күн бүгүн учуокка 16 тыһыынча киһи турар. Саамай тэнийбит ыарыыларынан тыҥа, түөс, быар искэҥэ буолаллар. Кэнники сылларга ыарыыны быһаарыы тупсан, эрдэ булуу көрдөрүүтэ тубуста", - Татьяна Николаева, корреспондент.

Дьокуускайдааҕы онкологическай кииҥҥэ күҥҥэ 200 тахса киһи кэлэн көрдөрүнэр. Быйыл искэҥинэн ыалдьар дьон 2024 сылы кытары холоон көрдөххө 1,3% аччаабыт, ол эрэн уопсайа 5 сыл иһигэр 15,8 % үрдээбитэ бэлиэтэнэр. Мэҥэ Хаҥалас улууһун Павловскай нэһилиэгин олохтооҕо Юрий Старостин кииҥҥэ эмтэммитэ сылтан орто. Урут ылбыт эчэйиитэ быарыгар охсон, искэҥҥэ кубулуйбутун былырыын быһаарыбыттар.

Юрий Старостин, Мэҥэ Хаҥалас улууһун олохтооҕо: "Тута бу кииҥҥэ аҕалбыттара. Онтон ылата манна эмтэнэбин. Сытан да эмэнэрбэр олус үчүгэйдик эмтээбиттэрэ, көрбүттэрэ. Сиэстэрэлэр олох сүүрэ сылдьаллар. Көрөллөрө-истэллэрэ үчүгэй".

Онкология диспансера түөрт блоктаах, ыарыыны быһаарар эксперт-кылаастаах тэриллэринэн толору хааччыллан турар. Онон искэҥи эрдэ булар кыах баар. Холобур, эндоскопия салаатыгар уопсайа сэттэ оборуудабанньа баар,  биир сардаҥанан эпэрээссийэлиир сир.

Иван Яковлев, СӨ онкологическай диспансерын эндоскопияҕа салаатын сэбиэдиссэйэ: "Бу былырыын саҥа кэлбит аппараат. Көрдөрөр хаачыстыбата 4К, ол иһин саҥа тахсан эрэр искэҥи буларга аналлаах. Манан киһи иһин, куртаҕын, тыҥатын уонна да атын уорганнарын көрөбүт". 

Лаборатория салаатын  күүһэ эмиэ биллэ улааппыт. Этиллибитин курдук, эрдэ федеральнай кииҥҥэ ыытыллар анализтары миэстэтигэр оҥорор буоллулар. Исписэлиис ахсаана икки төгүл элбээтэ. Саҥа киин тутулла илигинэ 2,5 тыһыынча эппэрээссийэ оҥоһулла сылдьыбыт буоллаҕына, бу сыыппара номнуо 5 тыһыынчаҕа тэҥнэһэн турар. Ону тэҥэ нэһилиэнньэҕэ 2020 сылтан ыытыллар ыарыыны сэрэтэр тэрээһиннэр үтүө түмүктээхтэр.

Феодосия Иванова, СӨ кылаабынай онколога,СӨ онкологическай диспансерын эмтээһин салаатын салайааччы: "Ыарыыны сэрэтэр бырагыраамалар сүрдээх көдьүүстээхтик үлэлээтилэр. Ол курдук 2024-2025 сс. ыалдьыы, өлүү, эрдэ ыарыыны булуу көрдөрүүтэ тупсуута ити бырагыраамалар түмүктэрэ".

Салгыы "Онкопоиск", ону тэҥэ дьахтар доруобуйатын бырагыраамалара киэҥник үлэлээн элбэх киһини хабар соруктаахтар.  Ыарыыны эмтиэхтээҕэр, эрдэттэн сэрэппит ордук.