"Дьулуур" спартакиада: остуол тенниһигэр тыҥааһыннаах киирсиилэр

Быйыл 800 тахса доруобуйаларынан хааччахтаах спортсменнар "Дьулуур" спартакиадаҕа кыталлар. Сахалыы параолимпийскай оонньууларга быйыл 7 көрүҥҥэ күрэхтэһэллэр. Онтон биирдэстэринэн буолар остуол тенниһэ. Аммаҕа ааспыт спартакиада кыайыылааҕа Александра Слепцова бу көрүҥүнэн дьарыктаммыта 7 сыла буолла. Кини күн ахсын тохтоло суох "Дохсун" спорт киинигэр кэлэн эрчиллэр. Дойду араас куораттарыгар сылдьан өрүү ситиһиилээхтик кыттар. Бэйэҕэр итэҕэйэр буоллаххына хайаан даҕаны бастыҥ миэстэни ылаҕын диэн санаалаах.

Александра Слепцова,  "Дьулуур" спартакида кыттааччыта: "Сочига, Крымҥа, онтон да атын куораттарга ыытыллар күрэхтэргэ кыттабын, бастыыбын, иккистиибин. Бэйэҕэ эрэниэххэ наада. Онуоха ккүстээхтэри кытта оонньуубун, оччоҕо өссө күүс киирэр".

Теннискэ өрөспүүбүлүкэ араас улуустарыттан 16 хамаанда кыттыыны ылар. Уопсайа 112 спортсмен. Доруобуйатынан хааччахтаах киһиэхэ спорт элбэх сыраны ирдиир, ол курдук остуол тэнниһэ эмиэ. Оннук курдук кытааччылар кэтэр таҥастарыттан саҕалаан, оонньуур тиэхиньикэлэригэр диэри барыта олус ураты буолар.   

“Оонньуу олус таһымнаахтык барар. Ирдэбил кытаанах, холобур, остуол тенниһигэр кэлээскэлээх дьон кытыыттан буолбакка ортотунан саайаллар”, - Афанасий Канаев, корреспондент.

Саха сириттэн элбэх биллэр-көстөр спортсмен тахсарын туһугар араас өйөбүл оҥоһуллар. Оннук курдук адаптивнай спорт көрүҥнэрин сайыннырар киин үлэлиир. Сиһилии ылан көрдөххө, быйыл оонньуу таһыма үрдээбитэ биллэр. Саха сирин спортсменнара дойду таһымыгар тахсыбыттара чуолкай.

Михаил Платонов, "Дьулуур" спартакиада теннис көрүҥүн сүрүн судьуйата: "Мин билэрбинэн Гоголев Алексей кытта сылдьар. Кини өрөспүүбүлүкэ элбэх төгүллээх чемпиона, дойдуга эмиэ үгүс кыайыылаах". 

"Дьулуур" спартакиада үөрүүлээх арыллыытыгар судьуйалар, спорстменнар, волонтердар сэлэлии хаамтылар. Кыттааччыларга ситиһиини уонна кыайыыны баҕаран туран үтүөлээх артыыстар ырыанан-тойугунан көрүстүлэр.  "Туймаада" стадиоҥҥа спортка кылаат киллэрбит дьон мустаннар сахалыы параолимпиада былааҕын дуоһуйа көтөхтүлэр. Күрэх уота умайан күүстээх киирсии саҕаламмыта биллэриллиннэ.