Дьокуускай сыбаалкатыгар уоту умуруоруу салҕанар

Туох да көстүбэт, ыыс буруо. Умайа турар сиргэ кумах кутар массыынаҕа олорсон айанныыбыт. Сыбаалка буолан суола-ииһэ мөлтөх. Эбиитин туох да көстүбэт буолан,  ыйан биэрээччи сирдээбит эрэ суолунан айанныыбыт.

Юрий Спиридонов, "Жилкомсервис" тэрилтэ салайааччыта: "Саамай хабыллар хаба ортотугар кэллибит. Манан умайбыта, ону бу барытын кумаҕынан бүрүйбүппүт. Ол иһин тиэхиньикэ айанныыр суоллаах. Наһаа үрдүк, батылларбыт буолуо. Ыйан биэрээччи ол турар. Манна түһүөххэ". 

Дьокуускай бөҕү тоҕор сирэ ааспыт өрөбүлтэн быһа умайа турар. Күн бүгүн баһаар иэнэ 1 гектар 20 суотай диэн ааҕыллар. Түүннэри-күнүстэри умуоруу үлэтэ барар, ол эрэн билиҥҥитэ кыайтара илик. Буруо быыһынан уустук үлэни сыбаалканы дьаһайыыга эппиэттээх "Жилкомсенрвис" тэрилтэ ыытар.  

"Үлэ саамай күүскэ барар турар сиригэр кэллибит. Манна олус хойуу буруолаах. Маннык икки хос мааскалаах да тыынарга уустук. Көстөрүн курдук, бульдозердар уоту кумаҕынан саба кутан умуруораллар", - Мария Дмитриева, корреспондент.

Сыбаалка баһаарын кумаҕынан эрэ умуруоруллар. Уунан куттахха буруота өссө хойдор уонна сытыйан өссө лыыбыран гаас үөскээһинэ элбиир. "Жилкомсервис" тэрилтэ салайааччыта Юрий Спиридонов этэринэн күннээҕи бөх, сүрүннээн ас тобоҕо, биогаас диэни үөскэтэр. Манна тыал үрэн салгын киирдэ эрэ умайбытынан барар. Оттон быйыл олус тыаллаах онон баһаар иэнэ олус түргэнник кэҥээбит.

Юрий Спиридонов, "Жилкомсервис" тэрилтэ салайааччыта: "Сууккаҕа икки симиэнэ. Ол курдук 2 бульдозер, 11 буор тиэйэр массыына,  2 погрузчик уонна 16 киһи. Бу биир симиэнэҕэ, иккискэ эмиэ ити курдук. Күҥҥэ 1000 кыбадыраатынай миэтэрэ сири кумаҕынан кутан, баһаары толору умуруорарга чугаһаан иһэбит ".   

Күҥҥэ 3 тыһыынча куб кумах тиэллэр, маны барытын умайа турар сиргэ таһаллар. Уустук усулуобуйаҕа үлэ барар буолан, тиэхиньикэ кээһэниитэ, батыллыыта үгүстүк тахсар. Ол эрэн тута миэстэтигэр өрөмүөннэнэр буоланнар үлэ тохтообот. Бу үлүгэрдээх сыт-сымар, буруо барыта Дьокуускайга тиийэ кэлэр. Онон күннэтэ 6 сиргэ хаачыстыбаны бэрэбиэркэлииллэр.

Георгий Игнатьев, Роспотребнадзор Саха сиринээҕи салалтатын санитарнай кэтээн көрүү салаатын салайааччытын солбуйааччы: "Дьокуускай куорат уокуругар, биллэн турар, буруо баар. Бу тыалтан тутулуктаах. Биһиги исписэлиистэрбит тыал хайа диэки үрдэ эрэ, ол туһаайыынан салгын хаачыстыбатын бэрэбиэркэлиибит. Билиҥҥитэ нуорманы куоһарыы бэлиэтэнэ илик".

Күннээҕи үлэ хаамыытынан суоттааннар бу өрөбүллэргэ баһаары толору умуруорары былаанныыллар. Маныаха уоту кыайа тутуу тыалтан улахан тутулуктаах.