Сайыны баттаһа суол өрөмүөнэ тэтимнээхтик барар

Быйыл Дьокуускай үрдүнэн "Олоххо-дьаһахха аналлаах инфраструктура" национальнай бырайыак чэрчитинэн 8 суол саҥардыллыаҕа. Уопсайа 7 килэмиэтир уһуннаах суол оҥоһуллуоҕа. Онтон 400 тахса миэтэрэтэ саҥа суол, уоннааҕыта баар уулуссалары төрдүттэн саҥардаллар. Олох саҥа суолунан бу 203 түөлбэҕэ Ефимов аатынан уулусса буолар.

"Билигин суол оннун бэлэмнээн, буор уонна таас кута сылдьаллар. Хабаров уулуссатыттан саҕалаан Ларионов аатынан уулуссаҕа диэри уопсайа 400-чэкэ миэтэрэ. Сатыы дьон сылдьарыгар табыгастаах буоллун диэн икки өттүттэн тротуардаах буолуоҕа. Аны күһүн алтынньыга суол үлэтэ түмүктэнэрэ күүтүллэр", - Татьяна Николаева, корреспондент.

Ефимов уулуссата дьэ капитальнай өрөмүөннэнэн айаан-сырыы тупсуоҕа. Суол икки балаһалаах буолар. Күн ахсын улахан тиэхиньикэлээх биригээдэ суол оннун бэлэмнир.  Бу эбийиэккэ суол үлэлэрин "РИК-Автодор" тэрилтэ сүрүннүүр.

Александр Аммосов, суол өрөмүөнүн үлэһитэ: "Билигин щебенка кута сылдьабыт. Улахан күүс  Сэбиэскэй Армия 50 сыла уулуссаҕа буолан, суоппардарбыт иккилэр эрэ".

Ефимов, Ярославскай-Хабаров уулуссалар силбэһиилэрэ эмиэ оҥоһуллуоҕа. Манна светофорунан салаллар хамсааһын биир кэлим буолан толору оҥоһуллуохтаах. Өрөспүүбүлүкэ үрдүнэн быйыл уонтан тахса улууска суол-иис оҥоһуллар.

Гаврил Окороков, СӨ суол салалтатын суол хаһаайстыбатын салаатыгар сүрүннүүр эксперэ: "11 эбийиэктээхпит. Ол курдук Амма, Өймөкөөн, Ленскэй, Нам, Уус Алдан, Чурапчы, Хаҥалас, Булуҥ улуустарыгар. Уопсай уһуммут 75 килэмиэтир буолар". 

"Умнас" өрөспүүбүлүкэтээҕи суол 63 килэмиэтирэ. Уулаах Аан нэһилиэгин таһыгар уопсайа 2 килэмиэтир 70 миэтэрэ уһуннаах суол өрөмүөнэ ыытылла турар.

Дмитрий Неустроев, "РИК-Автодор" тэрилтэ геодезист үлэһитэ: "Аспаалы икки хос уурабыт. Бастакы дьапталҕата 7 сантымыатыр, оттон үөһэ өттө 5 сатымыатыр ". 

Оттон федеральнай суоллары ылар буоллахха "Лена", "Халыма", "Бүлүү" суолларын учаастактарыгар үлэ эмиэ көхтөөхтүк барар.

Георгий Щукин, "Бүлүү" суол салалтатын капитальнай тутууга салаатын салайааччы: "Уопсайа 19 эбийиэк оҥоһулла турар. 75 киэлэмиэтир төрдүттүттэн оҥоһуллар, 85 килэмиэтир өрөмүөннэнэр. Быйыл 11 суол кэрчигин үлэҕэ киллэриэхпит. Уопсайа 93 килэмиэтир буолар". 

Оттон Табаҕа диэки Дьокуускайы уонна Өлүөнэ күргэтин кытта ситимниир 4 балаһалаах суолу оҥоруу 2028 сылга диэри ыытыллара былааннанар.