"Земскай култуура үлэһитэ" бырагырааманан 9 исписэлиис үлэлии барыа

Саха сирин Бырабыытылыстыбатын 2 №- дээх дьиэтигэр культура уонна ускуустуба эйгэтин үөрэхтэрин бүтэрээччилэри чиэстээһин ааста. Быйыл 180 устудьуон үөрэх кыһатыттан кынаттанан үлэлииргэ бэлэм. Кинилэр истэригэр А. Д. Макарова аатынан Культура уонна ускуустуба колледжын социальнай-култуура салаатын бүтэрээччи Алина Адамова. Кини бүтүн дойдутааҕы "Земский работник культуры" бырагырааманан Томпоҕо үлэҕэ киирээри бэлэмнэнэр. Атын улууска үлэлии барар олус долгутуулааҕын үллэстэр.

Алина Адамова, А.Д. Макарова аатынан культура уонна ускуустуба колледжын 3 кууруһун устудьуона: «Билбэт сиргэр бараргар бастаан куттал баар буолар. Ол эрэн мин атын сиргэ барарбыттан олус үөрэбин, интэриэһиргиибин».

Бу бырагыраама 2025 сылтан саҕалаан үлэлиир. Бүтүн дойду үрдүнэн 1 мөлүйүөнү биэрэр буоллахтарына Хотулуу-Илиҥҥи федеральнай уокурук үрдүнэн 2 мүллүйүөҥҥэ тэҥнэһэр. Эдэр исписэлиистэр кыра нэһилиэктэргэ музейга, тыйаатырга, кулуубка, бибилэтиэкэҕэ үлэҕэ киириэхтэрин сэп. Саха сирин култуура уонна ускуустуба эйгэтин үөрэхтэрин бүтэрэр устудьуоннар 70% номнуо үлэлиир сирдэрин булуннуллар, оттон хаалбыт 30% Арассыыйа улахан куораттарынан култуура кииннэригэр үөрэхтэрин салҕыыр былааннаахтар.

Павел Сазонов, М.Н. Жирков аатынан музыка колледжын дириэктэрэ: «Земскай култуура үлэһитэ" бырагыраамаҕа хапсан быйыл биһигиттэн 2 оҕо үлэлии барыахтаах. Бүтэрбит устудьуоннарбыт бары үлэ миэстэтэ булан олороллор. Итини сэргэ соҕуруу куораттарга үрдэттэр былааннаахтар».

Ону таһынан кыһыл дипломунан үөрэхтэрин түмүктээбит устудьуоннарга махтал суруктар туттарыллыннылар, эҕэрдэ тыллар этиллиннилэр. Онтон хас да сылы быһа бүөбэйдээн, көрөн такайан улаатыннарбыт уһуйааччылары чиэстээтилэр.

Афанасий Ноев, СӨ култуура уонна духуобунай сайдыы миниистирэ: «Биһиги улуустарбытыгар үлэлии баран эрэллэр. Бу биһиэхэ улахан ситиһии диэн этиэххэ наада. Ыччат тыа сиригэр култуураны уонна устуустубаны сайыннараары баҕа өттүнэн куонкуруска кыттан, кыайан баран эрэллэрэ сүрдээҕин үөрдэр».

Үөрүүлээх күҥҥэ быйылгы сыл бастыҥ тэрээһинин ааттаатылар. Хабаровскай куоракка бэс ыйын 8 күнүттэн саҕалаан 13 күнүгэр диэри "Российкая студенческая весна" фестиваль түмүгүнэн Саха сирин хамаандата бастыҥ буолла.