Суолга күүһүрдүллүбүт бэрээдэк олохтонно

Куорат суолга-иискэ кэтиир сулууспатын иниспиэктэрэ Айаал Багдалысов ис дьыала уорганнарыгар үлэлээбитэ 5 сыла, ГАИ-га сылтан ордук сулууспалыы сылдьар. Хабаров уулуссатыгар массыыналары тохтотон суоппардары бэрэбиэркэлиир. Сүрүннээн ыытар бырааптарын, докумуоннарын көрөр.

Айаал Багдалысов, суол-иис сулууспатын инспиэктэрэ: "Суоппар быраабын бэрэбиэркэлиибит. Ону таһынан страховкаларын, курдарын бааммыттарын көрөбүт". 

Дьокуускай куорат үрдүнэн өрөбүллэргэ бэс ыйын 12 күнүттэн 14-гэр диэри уопсайа 13 суол быһылаана таҕыста, биир киһи эчэйбитэ биллэр. Сыл саҕаланыаҕыттан өрспүүбүлүкэ үрдүнэн 240 тахса суол быһылаана тахсыбытын түмүгэр 19 киһи суорума суолланна, 300 тахса киһи араас эчэйиини ылла. 

«Ааспыт өрөбүл күннэргэ Саха сирин үрдүнэн уопсайа 19 суол быһылаана таҕыста. Ол түмүгэр 6 киһи араас эчэйиини ылла, 1 киһи суорума суолланна», - Татьяна Николаева, корреспондент.

Былырыыҥҥы сылы кытта тэҥнээтэххэ, суол саахалын, киһи өлүүтүн уонна эчэйиитин көрдөрүүтэ 8%  аҕыйаабыта бэлиэтэнэр. Быһылааннар тахсар сүрүн төрүөттэринэн биир үксүн ыытааччылар куттала суох тургэни тутуспаттарыттан, туһааннаах  туорааһыннарга сатыы дьону ыыппаттарыттан,  ону тэҥэ итирик туруктаах уруулга олорууларыттан тахсар.  Куорат иһигэр бэрэбиэркэ түмүгүнэн быраабылалары кэһии күннэтэ бэлиэтэнэр.   

Айаал Багдалысов, суол-иис сулууспатын инспиэктэрэ: "Курдарын баамматтар уонна олус элбэхтик суол уруһуйдаммыт бэлиэлэри кэһэллэр".  

Билигин сайыҥҥы кэмҥэ бэлисипиэт, матасыыкыл кыттыылаах саахал ыам ыйыттан саҕалаан күн аайы бэлиэтэнэр.Онтон сиэттэрэн суол иниспиэктэрдэрэ нэдиэлэ ахсын сэрэтии аахсыйатын тэрийэллэр.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбаннай иниспиэктэрэ: "Убаастабыллаах суоппардар, суол быһа охсуһууларыгар бука диэн болҕомтолоох буолуҥ, курданаргытын умнумаҥ, сөптөөх түргэни тутуһун, аһыы утах иһэн баран уруулга олорумаҥ". 

Күүһүрдүү кэмигэр ГАИ иниспиэктэрдэрэ нэһилиэктэргэ киириигэ-тахсыыга маассабай бэрэбиэркэлэри ыытыахтара. Оттон дойду уонна регион суолталаах суолларга иниспиэктэрдэр көһө сылдьан үлэлиэхтэрэ.