"Үйэлээх чороон - өбүгэм ситимэ" быыстапка арылынна

Саха төрүт үгэһин, култууратын, историятын кэпсиир "Үйэлээх чороон - өбүгэм ситимэ" диэн ааттаах быыстапка арыллыыта ураты буолла. Саҕаланыытыгар Саха сирин уустара саха балаҕаныгар мустан, дьоҥҥо-сэргэҕэ бэйэлэрин билиилэрин тарҕатар, үөрэтэр тэрээһини ыыттылар.

Афанасий Лопатин, СӨ норуотун маастара: "Ытык иһиппитин бар дьон билиэхтээх диэн сыаллаах үлэлии олоробут. Ол курдук Уус Алдантан Владимир Егоров, Тааттаттан Василий Лопатин, Федор Чээрин уонна Саха түмэлин худуоһунньук-реставратора Василий Протопопов буоламмыт".

Таатта улууһуттан сылдьар норуот маастара Федор Чээрин саха дьоно барытыгар талааннаах, дьоҕурдаах, үөрэниэн баҕалаах киһи элбэҕин үллэстэр. Хас биирдии чочуллан оҥоһуллар чороон туспа ис хоһоонноох, ойуулаах, ураты буолар.

Фёдор Чээрин, СӨ норуотун маастара: "Холобур, биир атахтаах чороон оһуора туспа буолар, үс атахтаах киэнэ эмиэ туһунан. Чорооҥҥо саамай уустуга куурдуута. Инчэҕэйдии хаһан баран кууруор диэри наһаа элбэх бириэмэ барар".

Оттон бу тэрээһин, сэдэх экспонаттар диэн бырайыак чэрчитинэн ыытыллар. Суруналыыс Сардаана Баснаева быйыл Култуура сылыгар, түмэллэри кытта холбоон оҥорбут ураты бырайыага буолар.

Майя Власьева, Олоҥхо тыйаатырын литературнай салаатын салайааччыта: "Быйыл “Чороон” диэн бырайыагынан үлэ бөҕө саҕаланан эрэр музейдары кытары. Саха киһитин дьиэтигэр хайаан да чороон баар буолуохтаах. Онон бу кэлэн холоно олорорбут наһаа үчүгэй. Маастар кылааһы биллэр маастардар биэрдилэр". 

Тэрээһин үөрүүлээх арыллыытын кэҥҥэ, мустубут дьону Саха түмэлигэр быыстапкаҕа ыҥырдылар. Быыстапкаҕа түмэл пуондатыттан, улуустартан, барыта 60 кэриҥэ чороон көрдөрүүгэ турда.

Марианна Стручкова,Саха түмэлин быыстапка салаатын салайааччы: "Археологическай хаһыыттан булуллубут 15 үйэтээҕи чороон көрдөрүүгэ турда. Ол кэннэ 18 үйэттэн саҕалаан оҥоһуллубут чорооннор, ону тэҥэ билиҥҥи норуот маастардарын үлэлэрэ көрдүрүүгэ турда ".

Саха төрүт үгэһин көрдөрөр быыстапка Саха түмэлигэр балаҕан ыйын ортотугар диэри көрдөрүүгэ туруоҕа.