Ыһыахтарга бэлэмнэнии сүпсүлгэнэ үүннэ

Мария Юмшанова иис маастара. Үөрэҕирии эйгэтигэр 40-тан тахса сыл устата үлэлиирин тухары ииһи кытта арахсыбакка дьарыктанан кэллэ. Ыһыахтар саҕаланыыларыгар үлэбит биллэ эбиллэр диэн кэпсиир. Баай уопуттаах иистэнньэҥ бу эр киһи хомуһуолун күҥҥэ иккини тигэн таһаарар. Билигин үлэ тохтобокко бара турар. Мария Николаевна сырдык алгыс түһэр ыһыахха санааҕын ууран турар иистэнэр наада диэн этэр.

Мария Юмшанова, иис маастара: «Саха таҥаһын тигиитэ атын таҥас курдук буолбатах, кини уустук. Холорбур хомуһуол баархаттаах , дьугдьуурдаах, барыта подклад».

Биирдиилээн да иистэнньэҥнэргэ, бөдөҥ даҕаны сыахтарга ыһыах таҥаһын тигии төгүрүк сыл устата тардыллар. Саха таҥаһын тигэр олохтоох фабрика үлэтэ күөстүү оргуйар. Манна уонунан истэнньэҥ күн солото суох. Тыһыынчанан халадаай, камзол, оҕо таҥаһа, ырбаахылара бу талааннаах иистэнньэҥнэр илиилэринэн бэлэм буолан тахсар. Саха таҥаһын билигин ыһыахха эрэ буолбакка, араас тэрээһиннэргэ көхтөөхтүк кэтэр буолбуттара кэрэхсэбиллээх. 

Лена Иванова, сыах быһааччы үлэһитэ: «Билигин лүөнтэн араас өҥнөөх былааччыйалары көрүөххүтүн сөп. Ону таһынан биһиэхэ оҕуруолаах лүөн былааччыйалар кэлэн тураллар. Араас моһуоннаах халадаай былааччыйалар бааллар».

Хас биирдии халадаай ураты, туспа ис хоһоонноох. Иистэнньэҥнэр билигин улахан сакааска үлэлии сылдьар буолан түбүк үгэнэ. Тэрилтэ өрөспүүбүлүкэҕэ ыытыллар бөдөҥ тэрээһиннэр таҥастарын-саптарын бу сыллар тухары үрдүк хаачыстыбалаахтык тигэн кэллэ. Ону тэҥэ быйыл аан бастакытын норуоттар икки ардыларынааҕы таһымнаах Форумҥа ыаллыы эрэгийиэн сакааһын ылан үлэлэһэллэр.

Александра Колесова, саха таҥаһын тигэр фабрика салайааччыта: «2011 сыллаахтан тэрилтэ быһыытынан үлэлээн саҕалаабыппыт. Икки хайысханы тута сылдьабыт. Бастакыта – сахалыы таҥаһы тигэбит уонна өрөспүүбүлүкэбит дьонугар атыылыыбыт. Иккис хайысхабыт – өрөспүүбүлүкэҕэ буолар улахан тэрээһиннэргэ тигии өҥөтүн биэрэбит».

Сыана туһунан этэр эбит буоллахха халадаайы ортотунан 8 тыһыынчаттан, камзолу 13, оҕо ырбаахыларын 3-4 тыһыынчаттан саҕалаан атыылаһыахха сөп. Билиҥҥи кэмҥэ саха таҥаһын тигии бэрт сайдан турар, онон күн эгэлгэ таҥаһы талар кыах баар. Дьон үксэ сакаастаан, биитэр олохтоох маҕаһыыннартан бэлэми атыылаһыан сөп.