Успуордунан дьарыктаныы сынньалаҥ да кэмигэр тохтообот

Быйыл Манчаары Баһалай аатынан саха төрүт көрүҥнэрин сайыннарар киин 20 сылын туолар. Манна хапсаҕайга, мас тардыыһытыгар, ыстаныыга, хотугулуу многоборьеҕа, хабылык хаамыскаҕа, гиирэҕэ уонна ох саанан ытыыга Дыгын оонньууларын кыттаачыларыттан саҕалаан оскуола оҕолоругар диэри дьарыктаналлар.

Кыра иитиллээччилэр сылы эргиччи эрчиллэллэр. Кинилэргэ анаан араас күрэхтэр ыытыллаллар. Ону тэҥэ сайын эмиэ лааҕыр үлэлиир. Оннук курдук 12 саастаах Мурат Шкулёв ыстаныынан дьарыктаммыта 6 ыйыгар барда. Кыра да буоллар билиҥэттэн Дыгын оонньууларыгар кыттыахтаахпын диэн күүстээх санаалаах.

Мурат Шкулёв, Манчаары Баһылай аатынан саха төрүт көрүҥнэрин сайыннарар киин иитиллээччитэ: «Бу лааҕырга 9:30 саҕаланар, дьарык 14:00 чаастан. Эппин сайыннараары, үчүгэйдик ыстанаары уонна мэдээл ылаары дьарыктанабын».

Сарсыардаттан оҕолор дьарык саҕаланар. Тренердэр сороҕор мөҕөн ыллаллар, кыра спортсменнар тустарыгар олус долгуйаллар. Күрэхтэргэ кыайыыны ыллахтарына, кинилэри кытары тэҥҥэ үөрэллэр уонна киэн тутталлар.

Айастаан Колесов, Манчаары Баһылай аатынан саха төрүт көрүҥнэрин сайыннарар киин тренерэ: «Эбиллэн иһэллэр аҕай, көрөргө олус үчүгэй. Күрэх буолан ааспыта, онно Боотур кулууп иитиллээччилэрэ сүрдээх ситиһиилээхтик кыттыбыттара. 1, 2, 3 миэстэни барытын ылбыттара».

Бу киин аан дойду таһымнаах спортсменнары иитэн таһаарар. Онуоха эрчиллэр усулуобуйата аныгы стандартка барытыгар эппиэттиир. Саха сирин үрдүнэн төрүт успуорт көрүҥүн өрө туппут Модун киин - аатын дуоһуйа сүгэр.

Семён Николаев, Спортивнай резервэни бэлэмниир салаа салайааччыта: «Урут уруккаттан биһиги төрүттэрбит оҥорон кэлбит оҕону үөрэтэр, иитэр, такайар, бэрэбиэркэлиир, күүһүн уоҕун дьарыктыыр ньымаларын билиҥээҥҥэ диэри илдьэ сылдьыахтаахпыт. Саҥа быраабыла киллэрэн күрэхтэһиилэргэ оҥороммут киэҥ араҥаҕа тарҕатаммыт бэйэбит култуурабытын үрдүк таһымҥа көрдөрүөхтээхпит дии саныыбын».

Судаарыстыба төрүт спорт көрүҥнэрэ сайдалларын туһугар улахан өйөбүлү оҥорор. Күн бүгүн өрөспүүбүлүкэҕэ 30 тыһыынчаттан тахса киһи төрүт успуорт көрүҥнэринэн дьарыктанар, мантан 6 аҥаар тыһыынчата оҕолор. Оттон 2027 сылтан саҕалаан оскуола бырагырааматыгар киирдэҕинэ, ахсаан 2 бүк үрдүүрэ күүтүллэр.