Саха сиригэр ойуур баһаардарын утары үлэ салҕанар

Бу курдук анал тиэхиньикэни тустаах үлэһиттэр, тыаҕа ойуур баһаардарын умулларыыга туһаныахтара. Экология министиэристибэтэ бу тэрили Екатеринбург куоракка баар собуокка сакаастаан анаан-минээн оҥотторбут. Кини элбэх миэстэни ылбат, ыраах айаҥҥа табыгастаах, генераторынан собуоттанан үлэлиир.  

Виктор Омуков, "Якутлесресурс" тэрилтэ дириэктэрэ: «500 лиитэрэ ууттан 10 тыһ. лиитэрэ күүгэн ыһар. Ол баһаарга маска, минбалаһаҕа сыстан баран 2-3 чаас турар».

Бу тиэхиньикэ Саха сиригэр бастакы буолар. Мэҥэ Хаҥалас улууһугар айаннаата. Үлэһиттэр, саҥа тэрили тургутан көрдүлэр, иһиттэн-таһыттан көрөн үөрэттилэр.

Айсен Никитин, "Якутлесресурс" тэрилтэ Мэҥэ Хаҥаластааҕы салаатын дириэктэрэ: «Мэҥэ Хаҥалас устун айанныыбыт, баһаар көрдүүбүт. Ону буллахпытына умулларарга көмөлөһүө дии саныыбыт».

Кэнники кэмҥэ, экология министиэристибэтэ материальнай базатын ханатар, анал тиэхиньикэтин, ньыматын элбэтэр. Бүтэһик сылларга Саха сиригэр ойуур баһаара биллэрдик аҕыйаабыта бэлиэтэнэр.

Маны сэргэ, тустаах министиэристибэ, ойууру чөлүгэр түһэрии үлэтин күүстээхтик ыытар, улахан болҕомто уурар. Маһы үүннэрэр питомник үлэҕэ киирбитэ иккис сылыгар барда, манна сылын аайы 500 тыһыынча бэс мас олордуллар.

Хас биирди, бэс мас сиэмэтэ, үөрэтиллэн, наарданан, улахан тургутууну ааһан баран, биирдэ анал ыраастаммыт, буорга олордуллор. Манна илии да, тиэхиньикэ үлэтэ барыта туһаныллар. Күн бүгүн олордуу үлэтигэр 20-чэ киһи үлэлии-хамсыы сылдьар.

Илья Соловьёв, "Якутлесресурс" тэрилтэ оҥорон таһаарар салаатын салайааччыта: «Субстрат диэн, мас олордорго табыгастаах буор. Күҥҥэ 750-800 кассета олордобут. Биир кассетаҕа 81 сиэмэ киирэр. Теплицэ толорорго 6 тыһ. тахса кассета олордобут».

Салгыы, күһүҥҥээнни диэри бэрдьигэстэр 8 см диэри уһаабыттарын кэҥҥэ, биирдэ аһаҕас сиргэ көһөрүөхтэрэ. Бу барыта, Саха сирин ойуурдарын чөлүгэр түһэрии, мастарын элбэтии туһугар ыытыллар.

Евгений Перфильев, СӨ айылҕа харыстабылыгар, экологияҕа уонна ойуур хаһаайыстыбатыгар миниистирэ: «В прошлом было высажено на территории республики около 8 млн саженцев, около 500 — это наши. В будущем планируем перейти на саженцы, полностью высаженные на территории республики».

Бу үлэ Ил Дархан Айсен Николаев тус ыйааҕынан ыытыллар. Уопсайа, маннык маһы үүннэрэр питомник Өрөспүүбүлүкэ үрдүнэн, Табаҕаҕа, Алдаҥҥа уонна Сунтаарга үлэлии турар.