Дьокуускайга бэтэринээрдэр тургутуү үөрэҕи аастылар
Тургутар үөрэх ис хоһооно биллэриллэр. Дьокуускай олохтооҕо, ыаллыы сытар эригийиэнтэн бэтэринээр көрүүтэ суох 10 сүөһүнү атыылаһан аҕалбыт. Онтон биирэ өлбүт. Бу эрэ кэннэ хаһаайын бэтэринээрдэргэ биллэрбит. Исписэлиистэр сүөһү өлүгүн көрөөт, тута манна суох сыстыганнаах ыарыы киирбитин сибикилииллэр. Бастакы дьайыыны Мэҥэ Хаҥалас улууһун бэтэринээринэй сулууспата көрдөрөр.
Саргылаана Тополина, Мэҥэ Хаҥаластааҕы бэтэринээринэй салалта салайааччыта: «Быйыл биһиги эпидочагка үлэлии сылдьар бэтэринээрдэри оонньоон көрдөрөбүт. Барытын көрдөрөбүт, маннык үөрэхтэр буолаллара наһаа туһалаах».
Бу ыарыы сүрүн сибикитэ сүөһү аһаабат буолар, температурата үрдүүр итиэннэ ыраахсыкка маарынныыр баастар тахсаллар, айаҕыттан күүгэн үллэр. Үөрэх хаамыытынан ящур диэн сыстыганнаах ыарыыга анализтары бэрэбиэркэҕэ ыыталлар. Ыксаллаах быһыы-майгы тирээбитин туһааннаах биэдэмистибэлэргэ, өрөспүүбүлүкэ салалтатыгар тута биллэрэллэр. Күүстээх үлэ ыарыыны сэрэтиигэ ууруллар.
Тургутууга ыарыы турар түгэнигэр кыттыгастаах биэдэмистибэлэр хамаанданан кытталлар. Манна экспертэр исписэлиистэр бары дьайыыларын сэргэ докумуону сөпкө толорууларын кытта бэрэбиэркэлииллэр. Бэтэринээрдэри сэргэ быраастар сүөһү тутар дьону чинчийэллэр. Уопсайынан баараҕай суолталаах харантыын үлэ саҕаланар. Тоҕо диэтэр ящур билиҥҥитэ эмтэммэт, биир саамай сыстыганнаах ыарыылартан биирдэстэрэ.
Алексей Максимов, Ленскэйдээҕи бэтэринээринэй салалта салайааччыта: «Ящур ыарыытынан сүөһү сыстар. Экономическай улахан хорумньу охсор сүөһү иитээччилэргэ. Эмтэнии оҥоһуллубат».
Дьолго, ящур диэн ыарыы Саха сиригэр хаһан да бэлиэтэнэ илик. Онон Арассыыйаҕа биһиги өрөспүүбүлүкэбит 10 үчүгэй туруктаах эригийиэҥҥэ киирэр. Ол эрэн холкутуйар сатаммат, бэтэринээрдэр хайа баҕар түгэҥҥэ бэлэм буолаллара ирдэнэр.
Игнатий Колодезников, СӨ бэтэринээринэй салалтатын салайааччы: «Саха сирин тулалыыр эрэгиэннргэ тура сылдьыбыта, ол иһин биһиэхэ киирэрэ кутталлаах. Ол иһин маннык үөрэх ыытабыт».
Үөрэтии түмүгүнэн Саха сиригэр сыстыганнаах ыарыы турар кэмигэр исписэлиистэр толору бэлэмнэрин экспертэр сыаналаатылар.
