Дьокуускайга кырдьаҕастары көрөр медицинскэй сиэстэрэлэргэ анаммыт научнай-практическай конференция буолла

Бу охтон түспүт саастаах киһини сөпкө туруорууга маастар-кылаас. Кырдьаҕастары көрөр-истэр медицинскэй сиэстэлэргэ анаммыт научнай-практическай конференция чэрчитинэн 4 маастар кылааһы тэрийдилэр. Манна улуустартан кэлбит сиэстэрэлэр, фельдшердар, социальнай үлэһиттэр туһалаах үөрүйэхтэри бараллар. Кырдьаҕастар дьиэлэригэр, биитэр балыыһаларга саастаах дьону көрүү-истии туспа ирдэбиллэри эрэйэр.

Виктория Иннокентьева, СӨ 3№-дээх балыыһатын медсиэстэрэтэ: «Кырдьаҕас дьон остеопорозтаах буоланнар таас сүһүөҕэ тостон хаалар. Ону хамсапакка туруорар курдук аан бастаан ыйытыахпытын наада туга ыалдьарын».

Өрөспүүбүлүкэтээҕи 3№-дээх балыыһа Гериатрическай киинэ үлэлээбитэ 26 сылыгар барда. Үйэ чиэппэрин тухары манна 60 саастарын аһарбыт дьон кэлэн араас эмтэниини ааһаллар. Улуустартан манна направлениянан киирэллэр, сылга ортотунан икки аҥар тыһыынча кырдьаҕаһы көрөллөр.

Светлана Обутова, СӨ Гериатрическай киин сэбиэдиссэйэ: «Сылтан сыл аайы уһун үйэлээхтэрбит элбээн иһэллэр, ол биһитини үөрдэр. Былырыын 150-ча 90 сааһын ааспыт аҕам саастаахатр киирэн көрдөрөн ааспыттара».

Хаҥалас улууһун Бэстээх нэһилиэгин олохтооҕо Василий Оленов ааспыт нэдиэлэҕэ кииҥҥэ киирбит. Василий Терентьевич үйэтин тухары тыа хаһаайыстыбатыгар зоотехнигынан, биригэдьииринэн үлэлээбитэ. 90 сааһыгар сылдьар кырдьаҕас 10 күн устата  эмтэниини ааһыахтаах.

Василий Олёнов, Хаҥалас улууһун олохтооҕо: «Усулуобуйа барыта үчүгэй, барыта баар. Аспыт эмиэ үчүгэй».

Олоҕун кыһыныгар сылдьар киһиэхэ киһиэхэ саамай сүрүнэ - үтүө сылаас сыһыан. Медицинскэй сиэстэрэлэр аҕам саастаах киһиэхэ истиҥ сыһыаннара чөлүгэр түһэллэригэр улахан болҕомтону ылар.

Любовь Колесова, СӨ 3№-дээх балыыһатын кылаабынай медсиэстэрэтэ: «Биһиэхэ 4 отделение баар. Терапевтическай, неврологическай, кардиология уонна отделение реанимации-интенсивной терапии диэҥҥэ ыарахан состояниялаах дьоннор эмтэнэллэр».

Конференцияҕа сиэстэрэлэр үлэлэригэр саҥа технологиялары, паллиативнай көмө сүрүн боппуростарын, кырдьаҕастар олохторун хаачыстыбатын үрдэтии боппуростарын дьүүллэстилэр.

Анна Ткаченко, Капитоновкатааҕы кырдьаҕастар дьиэлэригэр медсиэстэрэ: «Наадалаах бөҕө буоллаҕа биһиэхэ. Биһиги иккис сырыыбытын сылдьабыт».

Уһун көхтөөх олох национальнай бырайыак чэрчитинэн кырдьаҕастарга көмөнү оҥоруу саҥа таһымҥа тахсан сайдар.