Быйыл Былатыан Ойуунускай аатынан Саха тыйаатыра төрүттэммитэ 120 сыла

Тыйаатыр үбүлүөйдээх сылыгар бэлэмнэнии, саҥардыы үлэтэ тэтимнээхтик барар. Ааспыт ыйтан, тыйаатыр үрдүн өрөмүөннээн саҕалаабыттара. Билигин өрөмүөн үлэтэ түмүктүүр түһүмэххэ киирдэ.

Алексей Богдокумов, бэдэрээччик: «Үлэлээбиппит ый кэриҥэ буолла. 3600 кв.м. иэннээх крышаны оҥоро сылдьабыт. 80% бүттэ, хаалбытын сотору бүтэриэхпит».

Бу үлэ, Култуура национальнай бырайыак чэрчитинэн барар. Манна уопсайа, 9 мөлүйүөн үп-харчы көрүллүннэ. Бу кэннэ, тыйаатыр аттыгар, дьон-сэргэ сынньанар, күүлэйдиир аллеятын тутуу былааннанар.

Пётр Макаров, П.А.Ойуунускай аатынан Саха тыйаатырын дириэктэрэ: «Өр сыл өрөмүөнэмэккэ турбутун, барытын саҥардан бүтэрэн эрэбит. Маны бүтэрэн баран иһирдьэ киириэхтээхпит. Фойе, декорационнай зал өттүн барытын оҥоруохтаахпыт».

Быйыл, Саха тыйаатыра 120 сылыгар көрөөччүлэригэр элбэх, саҥа туруоруулары бэлэмнээн олорор. Маны таһынан үбүлүөйдээх сыл чэрчитинэн араас тэрээһиннэр ыытыллыахтара. Оттон, түмүктүүр улахан тэрээһин Москва куоракка буолуоҕа.

Пётр Макаров, П.А.Ойуунускай аатынан Саха тыйаатырын дириэктэрэ: «Биһи артыыстарбыт, 6 көлүөнэ Саха тыйаатырыгар үлэлиир артыыстар быра Малай тыйаатыр иһинэн Щепкин оскуолатыгар үөрэммит дьоннор. Ону биһи хайаатар даҕаны сибээһи, ситими сүтэрбэккэ эрэ Малай тыйаатыры кытта доҕордоһобут, онно тиийэн улахан испиктээкиллэрбитин көрдөрүөхтээхпит».

Тыйаатыр быйылгы айар сезонун икки улахан, саҥа испиктээкиллэринэн сабыаҕа. Билигин артыыстар тохтообокко репетициялыы сылдьаллар.

Руслан Тараховскай, П.А.Ойуунускай аатынан Саха тыйаатырын режиссёра: «Николай Алексеевич Лугинов – саха норуодунай суруйааччыта “Обот” диэн испиктээкилинэн, Андрей Саввич Борисов туруоруутунан бу сезону сабыахтаахпыт. Джон Стэйнбек – нобелевскай бириэмийэ лауриата, суруйааччы “Дьоннор уонна кутуйахтар” диэн сэһэнинэн олоҕуран “Үрэххэ” диэн испиктээкили туруора сылдьабын».

Оттон, күһүн "Хаарыан хампа күөх кытылым" диэн ааттаах улахан тыйаатыр бэстибээлэ ыытыллыаҕа. Киэн хабааннаах тэрээһиҥҥэ Арассыыйаттан, Аан Дойдуттан  кыттааччылар, ыалдьыттар кэлэллэрэ күүтүллэр.