Табаҕа тумуһугар 3 күннээх туристическай бэстибээл саҕаланна

Табаҕа тумуһугар өрөспүүбүлүкэ араас улуустарыттан оскуола оҕолоро мустаннар туристическай бэстибээлгэ кытталлар. Бу тэрээһин 1950 сыллартан ыытыллар. Сыл ахсын слет кыттааччылара айылҕаҕа тахсан сибиэһэй салгыҥҥа хононнор араас тургутуулары ааһаллар.

Быйыл бүтүн дойдутааҕы бастыҥнар хамсааһыннар "Походы Первых - больше чем путешествие" бырайыктарын чэрчитинэн ыытыллар. Оннук курдук хас да этаптаах күрэх оҥоһуллар.

Айаал Петров, СӨ Бастыҥнар хамсааһыннарын бырайыактарын салайааччыта: «Хоно сыталлар айылҕаҕа. Уопсайынан туризм Саха сиригэр син сайдыылаах соҕус. Оҕолорго айылҕаҕа тапталы иҥэринэ сатыыбыт».

Этаптар үс гына арахсаллар бастатан туран - палатканы туруорааһын, 5 килэмиэтирдээх походка барааһын. Иккиһинэн - тыа быыһыгар отметкалары булааһын уонна квест оонньуу. Үсүһүнэн айылҕа араас усулуобуйаларыгар тоһо бэлэмнэрин холоон көрүү.

Уопсайа 40 тахса оҕо кыттыны ылла. Кинилэри сааһыттан уонна уопуттарыттан көрөн икки бөлөххө арааран сатабылларын тургуталлар. Күрэххэ кыттааччылар миэстэтигэр сүүмэрдэнэн, талыллан кэлэллэр.

Анатолий Егоров, слёт кыттыылааҕа: «Бу этап миэхэ үчүгэйдик ааста. 71 балл ыллым. 30 мүн. иһигэр үчүгэй көрдөрүү дии саныыбын».

Туристическай кииннэргэ үлэ тохтоло суох сылы быһа барар. Кыһынын хайыһарынан тыаны кэрийэллэр, онтон саас уонна күһүн кыыллары көрөллөр

Егор Дьячковский, Амма улууһун туристическай киинин үлэһитэ: «38 оҕолоохпун. Саас уонна кыһын кыыллары аһатааччыбыт. Туртастарга бурдуктатааччыбыт».

Быйыл туристическай кииннэр лаппа элбээтилэр. Бастыҥнар хамсааһыннарын көмөтүнэн аны кэлэр сылга улуус аайы ыытыллар буолуохтара.