Мэҥэ Хаҥалас улууһугар социальнай киин үлэҕэ киирдэ

Аалай лиэнтэ быһыллар аҕам саастаахтарга анаан тутуллубут саҥа дьиэ арыллыбытынан ааҕыллар. Бэлиэ түгэн сахалыы сиэринэн алгыстан саҕаланар. Аал уоту аһаттыллар, алгыс тыла этиллэр. Саҥа дьиэ малааһыннаах тэрээһинигэр киин олохтоохторун сэргэ улуус, өрөспүүбүлүкэ салалтата кыттар.

Саҥа эбийиэк бастакы сыбаайата 2023 сыллаахха түспүтэ. Онтон билигин толору ситэн номнуо үлэлии турар. Олохтоохтор ыам ыйыттан саҕалаан киирбиттэр. Онон киин иһигэр олох күөстүү оргуйар. Дьарыктар, эмтэнии барыта толору барар. Аҕам саастаахтар ордук эт-сиин хамсаныылаах эрчиллиини сэҥээрэллэр.

Христина Егорова, эти-сиини эрчийэр дьарык инструктора: «Аралдьыйыахтарын наада, доруобуйаларын көннөрүнүөхтэрин наада. Олохторугар үөрүүлээх түгэннэр буолуннар диэн кинилэри санааларын көтөҕөөрүбүт үчүгэй олоххо тардыһалларын гына сылдьабыт».

Аҕам саастаах уонна доруобуйаларынан хааччахтаах дьон олорор саҥа киинэ 5 тыһыынчаттан тахса кв.м. иэннээх, уопсайа 51 миэстэлээх. хоско 2-3 буолан олороллор. Маны сэргэ быстах кэмҥэ олордорго эбии куойкалар бэлэмэнэнллэр.

Александр Куприянов, Маттатааҕы кырдьаҕастар социальнай кииннэрин салайааччы: «Билигин өссө атын технологияны – “Передышка” диэни киллэриэхтээхпит. Онно 14 куойка-миэстэ бэлэмнэнэн турар. Онно сатаан временно көрбөт буоллахтарына манна аҕалан көрдөрүөхтэрин сөп ол кэмҥэ».

Билигин саҥа дьиэҕэ уопсайа 42 киһи олохтоммут. Путевка барыта туолбут. Олохтоохтор онон номнуо бэйэ бэйэлэрин, киин үлэһиттэрин кытта билсэн дьиэлэригэр үөрэммиттэр.

Арина Тихонова, Маттатааҕы кырдьаҕастар социальнай  кииннэрин олохтооҕо: «Хоспутугар үһүөбүт, бэйэ-бэйэбитин өйдөһөбүт, кэпсэтэбит, үлэһиттэрэ наһаа үчүгэйдэр, амарахтар».

Кииҥҥэ хас биирдии киһи дьоҕурун, интэриэһин учуоттаан араас дьарыктар ыытыллаллар. Онон манна ким да чуҥкуйбат. Ону таһынан быраас анабылынан эмтэнии уонна массаж ылаллар. Өрөспүүбүлүкэҕэ "Дьиэ кэргэн" национальнай бырайыагынан үлэ тэтимнээхтик барар.

Георгий Степанов, СӨ Бырабыыталыстыбатын бэрэссэдээтэлин солбуйааччы: «Дьокуускай куоракка улахан өрөспүүбүлүкэтээҕи дьиэбит иккис уочарата тутулла турар. Ньурбаҕа улуустар икки ардыларынааҕы социальнай дьиэбит быйыл хапытаалынай өрөмүөнэ ааһан. Онно 100 тахса олорор киһибит саҥа малааһыннарын бэлиэтээбиттэрэ».

Итини сэргэ бу национальнай бырайыагынан 3 улууска субу курдук саҥа киин үлэҕэ киирбитэ.