Дьокуускайга "Сыл бастыҥ иитээччитэ" өрөспүүбүлүкэтээҕи күрэх саҕаланна

Ангелина Слепцова Өймөкөөн улууһуттан Сыл бастыҥ иитээччитэ күрэххэ кытта кэлбит. Ангелина  бэйэтэ Томтор нэһилиэгэр "Кэскил" уһуйааҥҥа иитээччинэн үлэлээбитэ 6 сылыгар барда. Эдэр иитээччи кырачааннары иитиигэ саамай сүрүнэ - оҕо интэриэһин тардыы буолар диэн санаалаах. Сыл бастыҥ иитээччитэ күрэххэ улуустартан уопсайа 25 кыттааччы кэллэ. Күрэх үөрүүлээх аһыллыытыгар кыттааччылар бөлөххө арахсан бэйэлэрин билиһиннэрдилэр.

Ангелина Слепцова, күрэх кыттыылааҕа, Өймөкөөн улууһа: «Саҥаны билээри, уопут атастаһаары уонна саҥа көрсүү-билсии».

Куонкурус арассыыйатааҕы ыытыллар күрэх бэрээдэгинэн барар. Ол курдук 2 түһүмэххэ арахсан хас биирдии кыттааччы тургутуу ааһар. Бастаан Дьокуускай 5 оҕо саадын базатыгар кырачааннары кытта үлэлээн идэтийбит үөрүйэхтэрин, дьарыктарын экспердиир хамыыһыйаҕа көрдөрүөхтэрэ. Ол түмүгүнэн кэлэр түһүмэххэ ааһар лауреаттары талыахтара.

Ольга Михалёва, үөрэҕирии үлэһиттэригэр идэ таһымын үрдэтэр уонна үөрэҕи сайыннарар институт дириэктэрин солбуйааччы: «15 лаурат быһаарыллар, маастар-кылаас көрдөрөллөр уонна онно үлэлэрин үчүгэй уопуттарын үллэстиэхтээхтэр. Иккис сылын ыытыллар үлэ көрүҥнээхпит – брифинг, онно кинилэр оҕону иитиигэ интириэстээх дьоннор ыйытыыларыгар эппиттээннэр интервьюга бэйэлэрин санааларын үллэстиэхтээхтэр».

17 сылын ыытыллар өрөспүүбүлүкэтээҕи күрэх бэнидьиэнньиктэн саҕаланан  барар. Бастакы күн күрэх аһыллыытын кэннэ кыттааччылар уһуйааҥҥа оҕолору уонна төрөппүттэри кытта аһаҕас дьарыкка бэлэмнэнэллэр. Туяра Васильева Сунтаар улууһун кииниттэн кэлэ сылдьар. Улууска ыытыллыбыт күрэххэ кыайан бэйэтин улууһун өрөспүүбүлүкэ таһымыгар көмүскүүр чиэскэ тиксибит. Бэл долгутуулаах түгэн, ол эрээри дьоһуннук кыттарга бэлэммин диэн этэр.

Туяра Васильева, күрэх кыттыылааҕа, Сунтаар улууһа: «Бастакы түһүмэх биллибэт этэ. Мин жеребьевка түмүгүнэн орто бөлөх оҕолоругар дьарык ыытар буоллум. Ону бүгүн киэһээ бэлэмнэнэбит. Төрөппүт мунньаҕа биллэр буолан бэлэмнэнэн кэлбиппит».

Куонкурус иккис түмүмэҕэр маастар-кылаастар, брифинг, онтон да атын тургутуулар кэннилэриттэн финалистары быһаарыахтара. Оттон сыл бастыҥ иитээччитэ үрдүкү ааты ким ылбытын чэппиэр күн бэс ыйын 11 күнүгэр быһаарыахтара. Оттон кыайыылаах дойду таһымыгар тиийэн Саха сирин чиэһин көмүскүөҕэ .