Гепатологтар өрөспүүбүлүкэтээҕи оскуолаларын конференцията буолла

Өрөспүүбүлүкэҕэ гепатологтар оскуолалара 25 сыл анараа өттүгэр профессор Марфа Алексеева көҕүлээһинэн аһыллыбыта. Бу кэм тухары оскуола үөрэҕин 2 тыһыынчаттан тахса быраас ааһан кэллэ. Манна сыллата исписэлиистэр, эмчиттэр, учуонайдар мустан вируснай гепатит ыарыыларыгар анаммыт билиилэрин, уопуттарын үүлэстэллэр, ыарыыны эрдэттэн булууга, эмтээһиҥҥэ саҥа ньымалары, хайысхалары дьүүллэһэллэр.

Снежана Слепцова, СӨ доруобуйа харыстабылын министиэристибэтин сүрүн инфекционист бырааһа: «4 сыл устата биһиги 3 тыһ. тахса киһини гепатит С эмтээтибит. Хас биирдии гепатит С-таах киһи босхо эмтэнэр. Дельта гепатит диэн баар, ыарахан гепатит. Бу диагностаах пациеннар эмиэ эмтэнэллэр. Өрөспүүбүлүкэҕэ 400-тэн тахса киһи бүгүн үчүгэй эмтэнии ыла сылдьар».

Аан дойду үрдүнэн вируснай гепатит биир саамай тэнийбит уонна кутталлаах инфекционнай ыарыынан биллэр. Гепатит биэс сүрүн көрүҥэ баар.

В уонна С  гепатит хроническай ыарыы быһыытынан сайдаллар уонна быар рагын, цирроһун сүрүн төрүөтүнэн буолаллар. Бүгүҥҥү күҥҥэ өрөспүүбүлүкэ үрдүнэн 10 тыһ. тахса хроническай вируснай гепатиттаах киһи учуокка турар.

Ольга Сагалова, Уральскайдааҕы федеральнай уокурук сүрүн инфекционист бырааһа: «У врачей республики огромный опыт лечения гепатита С. Поскольку это ваша региональная особенность, очень высокая заболеваемость и очень большой опыт современной терапии буливертидом. У нас тоже есть такие больные, мы участвовали в клинических исследованиях этого препарата. У нас больных просто гораздо меньше, поэтому всегда приятно узнать что-то новое, научиться чему-то новому у людей, которые имеют гораздо больший опыт».

Вируснай гепатитынан сааһыттан тутулуга суох ким баҕарар ыалдьыан сөп.  Онуоха эмчиттэр, чуолаан ыччакка өйдөтүү, сэрэтии үлэтэ көхтөөхтук тэриллиэн наада диэн сүбэлииллэр. "Уһун көхтөөх олох" национальнай бырайыак чэрчитинэн гепатит ыарыыны эрдэттэн диагностикалааһыҥҥа, эмтээһиҥҥэ үлэ көхтөөхтүк барар. Өрөспүүбүлүкэтээҕи СПИД Кииҥҥэ тэрийэр-методическай киин аһыллан хас биирдии ыарыһаҕы кэтииллэр.

Александра Золотарёва, СӨ "СПИД-Киин" кылаабынай бырааһа: «Былырыыҥҥыттан федеральный регистр диэн баар буолбута. Манна туох баар бастакы ыалдьыбыт киһиттэн саҕалаан хроническай ыарылаах дьон бааллар, ону биһиги барытын көрөммүт, истэммит, кинилэр хаһан эмтэммиттэрин, хайдах диспансернай учуокка көрө сылдьалларын барытын көрөбүт уонна быраастарга көмө буолабыт».

Хас биирдии киһи сылга биирдэ гепатит ыарыыларыгар анаалыс туттаран статуһун билэрэ наада. Ыарыыны эрдэттэн сэрэппит ордук.