Хаҥалас Нөмүгүтүгэр сылы эргиччи үлэлиир тэпилииссэ өлгөм үүнүүнү биэрэр

Хас эмэ сүүһүнэн оҕурсу  ситэн, үүнэ турарын бэс ыйын саҥатыгар көрөр сөҕүмэр.  Нөмүгүгэ бу кыһын сылы тохтообокко, кыһыннары сайыннары үлэлиир тэпилииссэ үлэҕэ киирбитэ.

"Тэпилииссэ олус улахан эбит. Билигин манна 20072 ук үүнэр. Хаһаайыстыба Мева диэн суорду олордор. Холобур, биир уктан 250 устуука оҕурсуну ылаллар", - Анастасия Добрянцева, корреспондент.

Атын тас регионнар улахан хаһаайыстыбалара олордор Мева суорт биһиги усулуобуйабытыгар сөп түбэһэрин билэн, Нөмүгүлэр бу көрүҥҥэ тохтообуттар. Билигин манна эдэр эрчимнээх Сандал Попов үүнээйилэри көрөн-харайан үлэлии сылдьар. Томороон тымныыга үлэлиир теплица гидропоника ньыматынан аһын биэрэр.

Сандал Попов,  хаһаайыстыба үлэһитэ: "Кыһыны олус үчүгэйдик туораатыбыт. Оһохпутун 50%  үрдэппэтибит. Поликарбонат сылааһы үчүгэйдик тутар эбит. Муостабыт ититиилээх уонна теплица тула ититии ситимэ тардыллан турар".

Технологиятын, суордун  табан оҕурсу манна өлгөмнүк үүнэр. Ыарыыга ылларбат, аһын үчүгэйдик биэрэр. Минньигэс амтаннаах оҕурсуну номнуо олохтоохтор билбиттэр. Манна бэйэтиттэн кэлэн талан, атыылаһан бараллар эбит. Сылы эргиччи сибиэһэй оҕурсунан хааччыллаллар.

Алексей Кондратьев, Нөмүгү олохтооҕо: "Арыллыаҕыттан сөбүлээн атыылаһабыт. Наар күнтэн күн сибиэһэйи атыылаһабыт. Маннык тэпилииссэ арыллыбытыттан үөрэбит. Оройуон аайы баара буоллар үчүгэй буолуо этэ".

Бу эйгэҕэ улахан кылаатын киллэрбит Иван Захаров сыдьааннара кини аатын үйэтитэр сыаллаах бу эбийиэги үлэҕэ киллэрбиттэр. Тэпилииссэ үлэҕэ киирэригэр улахан төһүү тыа хаһаайыстыбатын министиэристэбэтэ оҥорбут.  

Вячеслав Гаврильев, СӨ ТХМ сиртэн үүнүүнү ылыыга, мелиорацияҕа, материальнай-техническэй хааччыйыыга департаменын салайааччыта: "Дмитрий Иванович тэпилииссэтэ 1000 кыбадыраатынай миэтэрэ иэннээх. Сылга 50 туонна оҕурсуну ыларга былааннаах. Ону таһынан “Строительство малых мощностей” диэн   улуустар ылбыт боломуочуйаларынан субвенция үбүлээһинэ баар. Маннык көмө 20 улууска көрүллэр". 

Хаһаайыстыба сыллата былаанын улааттыннаран, улуус эрэ иһигэр буолбакка бүтүн өрөспүүбүлүкэни хабар сыаллаах үлэтин ыытар.