Музыка үрдүкү оскуолата аны кыһын үлэҕэ киириэҕэ

Дойду Президенын тус өйөбүлүнэн ыытыллар музыка үрдүкү оскуолатын саҥа дьиэтин тутуу былаанынан баран иһэр. Улахан тиэхиньикэ, кран тохтоло суох туһаныллар. 3 этээстээх оскуоланы тутуу иккис сылын көхтөөхтүк барар. Улахан үлэлэри ааспыт сылтан саҕалаабыттара.

"Билигин эбийиэккэ 70-ча киһи үлэлии сылдьар. Сүрүн үлэ тас бүрүөһүнү оҥорууга ууруллар. Бастаан сылааһы тутар матырыйаалынан туталлар, ол кэннэ тас бүрүөһүн. Бу үлэ, былаан быһыытынан, ый бүтүүтэ түмүктэниэ", - Татьяна Николаева, корреспондент.

Дьиэ тас үлэтин тэҥэ, үрдүн оҥоруу барар. Тас үлэлэ улахан аҥаара бүтэн турар, 30% кэриҥэ хаалла. Оскуола тутуутугар хас даҕаны биригээдэнэн тэҥинэн араас үлэни ыытар. Ис өттүгэр истиэнэни тэҥнээһини тэҥэ, инженернэй ситими, чуолаан ититии ситимин, вентиляцияны тардыы эмиэ барар.

Вениамин Ермолаев, тутар тэрилтэ үлэһитэ: "Сылааһы тутар бүрүөһүнү саҕалаатыбыт, ону тэҥэ оскуола тас өттүнээҕи сирин оҥорууга сотору кэминэн киириэхпит. Ититии систиэмэтин саҕалыахтаахпыт. Канализацияны оҥоро сылдьабыт".

Дойду Президенэ икки  сыллааҕыта Дьокуускайга кэлэ сылдьан, оскуолаҕа сылдьан учууталлары, иитилээччилэри кытта көрсөн, тутууну өйүүрүн биллэрбитэ. Оскуол уопсайа 9,5 тыһыынча  квадратнай миэтэрэ иэннээх, үс мэндиэмэннээх 240 миэстэлээх, 150 миэстэҕэ анаммыт инэринээттээх буолуоҕа. Саҥа оскуола тутуутун иитиллээччилэр, уһуйааччылар олус күүтэ сылдьаллар.

Урсун Громов, музыка үрдүкү оскуолатын устудьуона: "Олус диэн кэтэһэ сылдьабыт. Саҥа кылаастарыбытын өйбүтүгэр оҥорон көрөбүт. Улахан кэнсиэрдиир саала баар буолар. Ону тэҥэ бэлэмнэнэр икки сир, симфоническай, духуобунай оркестрдар баар буолуохтара". 

Манна идэтийбит музыканнары бэлэминииргэ бары усулуобуйа тэриллиэҕэ. Ол курдук кэнсиэрдиир саала, тыаһы-ууһу устар устуудьуйа, библиотека, спортивнай саала, остолобуой, анаан оҥоһуллубут кабинеттар баар буолуохтара.

Раиса Васильева, музыка үрдүкү оскуолатын иитэр-үөрэтэр методическай үлэҕэ салаатын салайааччы: "Аныгылыы тииптээх оскуола биһиги үөрэхпит таһымын үрдэтиигэ олус диэн наадалаах. Биллэн турар, үрдүк таһымнаах музыканнары иитэн таһаарыыга хаачыстыбалаах үнүстүрүмүөннэр, кабинеттар, кэнсиэрдиир саалалар наадалар". 

Оскуола саҥа үнүстүрүмүөнүнэн эмиэ толору хааччыллар. Быйыл оскуола үрдүкү үөрэҕин 16 оҕо, орто анал үөрэҕин 12 оҕо бүтэрэр. Кинилэр бары үлэнэн хааччыллан тураллар. Оскуола саҥа дьиэтэ быйыл, Култуура сылыгар, аны кыһын барыта ситэн-хотон үлэҕэ киирэрэ күүтүллэр.