Оҕолорго үлэ дьаарбаҥката ыытылынна

Оҕо сайыҥҥы кэмҥэ үлэнэн хааччыллыыта. Манна туһаайан сынньалаҥ пааркатыгар дьаарбаҥка ыытылынна. Кирилл уонна Сарыал 10 кылааска үөрэнэллэр, кинилэр кыра эрдхтэриттэн күүстэх үлэ диэн тугун билэллэр. Бу  дьаарбаҥка көмөтүнэн  "Үрдэл" пааркаҕа  үлэлии  киирэр буоллулар.

Кирилл Яковлев уонна Сарыал Макаров, 10 кылаас үөрэнээччилэрэ: "Официант да буолуохпун сөп, куруус да таһыам этэ, араас үлэни барытын толоруохпун сөп. Археологка үлэлээбитим, билиэт атыылаабытым, куруусчутаабытым, уопсайынан элбэх үлэҕэ үлэлээбитим". 

Ону таһынан дьаарбаҥкаҕа төрөппүттэр эмиэ кыттыыны ыллылар. Оҕолор сайыҥҥы кэмҥэ дьарыктаах буолаллара олус үчүгэй уонна төрөппүккэ туһалаах диэн санааларын үллэстэллэр.

Любовь Большакова, төрөппүт: "Дьаарбаҥканы сөбүлээтибит. Холобур, музыкальнай колледж 16 саастаах оҕону баһаатайынан лааҕырдарыгар ылаллар эбит. Оҕом үлэлиириттэн долгуйабын". 

Сыл ахсын 14 саастарыттан саҕалаан оскуола үөрэнээччилэрэ үлэлиэн сөптөөх сирдэрэ элбээн иһэр. Онуоха үлэлиир оҕо ахсаана тэҥинэн улаатар.  Былырыын 2000 курдук сокуоннай сааһын ситэ илик оҕо хамнас ылан кыһаллыбыт буоллаҕына, бу сыл былаанынан онтооҕор элбэх буолуохтаах. Үгүс чааһынай тэрилтэлэргэ сайынын үлэлээн бастакы хамнастарын туталлар.

Айтал Керемясов, СӨ нэһилиэнньэ дьарыктаах буолуутун киинин дириэктэрин солбуйааччы: "Үксэ үөрэх чааһыгар оскуолаларга, куорат хаһаайыстыбаларыгар уонна өҥөнү оҥоруу салаатыгар үлэ миэстэтэ тахсар". 

Онуоха 18 сааһын туола илик оҕолор нэдиэлэ иһигэр 24 чаастан элбэҕи үлэлиэ суохтаахтар, ыарахан ыйааһыннаах маллары таһар эмиэ көҕүллэммэт уонна хайаан даҕаны доруобуйа өттүнэн барыта эппиэттиир буолуохтаах. Бу маннык усулуобуйалаах үлэни булар олус уустук. Холобур, сыл ахсын оройуоннар дьаһалталара экологическай биригээдэҕэ үлэлиэн баҕарар оҕолору көрдүүллэр уонна оскуола үөрэнээччилэрин хамнаска үлэлэтэллэр. 

Анна Карбоканова,  Дьокуускай куорат киин уокуругун каадыры кытта үлэҕэ менеджерэ: "Биһиги оҕолору сайыҥҥы бириэмэҕэ дворник дуоһунаһыгар ылабыт. Сааһыттан көрөн 0,4 ыстаапкаҕа ылабыт. Бу ортотунан 17-19 тыһыынча солкуобай хамнас аахсаллар". 

Бэс ыйын 1 күнэ - Оҕо көмүскэлин күнэ буолан, дьаарбаҥканы кытары  лааҕырдар, орто үөрэхтэр, араас секциялар эмиэ маастар кылаастары көрдөрдүлэр.