Өрөспүүбүлүкэҕэ ыһыы үгэнэ

Сиэмэ хортуоска анал олордор тиэхиньикэҕэ кутуллар. Манна уопсайа биирдии туонналаах 3 куул киирэр. Хаһаайыстыба бэйэтин сиэмэтэ буолан хаачыстыбата үчүгэй, барыта биир тэҥ. Тыраахтырынан олордоллор, онон 3 киһи холкутук баараҕай иэннээх бааһыналары кыайа тутар. Ол эрэн хортуоска иҥнигэһэ суох түһүүтүн манаан, хайаан да икки өттүгэр  олорон эрэ кэтииллэр.

Валерий Ким оҕуруот аһын олордуунан дьарыктаммыта 30 тахса сыл буолла. Киниэхэ билигин оҕолоро кыттыһан, 3 хаһаайыстыба буолан, 100 тахса гектар иэннээх сиргэ хортуоска ыһаллар. Быйыл дьыл эрдэлээн ыһыы эрдэ саҕаламмыт.

Валерий Ким, "Ким" бааһынай хаһаайыстыба салайааччыта: "Быйыл арыый эрдэ саҕалаатыбыт, нэдиэлэ курдук эрдэ сылыйбыта. Ыһыы үмүрүйэн эрэр. Оҕуруот аһын барытын олортубут. Хортуосканы 20 гектарга ыһарбыт хаалла. Сиэмэбит тиийэр". 

Хаһаайыстыба Королева Анна диэн суорду сыллата олордор. Бу көрүҥ хортуоска харайыыта үчүгэй уонна амната минньигэс. Бу Марха быйаҥнаах сиригэр үүнэр оҕуруот аһа оҕо аһылыгар барар. Ол эбэтэр аны күһүн хомуур кэннэ оскуолаларга, уһуйааннарга тарҕаныа.  

«Уопуттаах оҕуруоччут Валерий Ким этэринэн билигин хортуосканы олордууга саамай табыгастаах кэм, олус итии да тымныы да буолбатах. Инньэ гынан буор сиигин тутар. Онон өрөспүүбүлүкэ бары хаһаайыстыбалара бу күннэри баттаһа ыһыыга таҕыстылар.Быйыл Саха сиригэр 60 тыһыынча гектар сиргэ ыһыы ыһыллыаҕа. Бу хайа да сыллааҕар элбэх көрдөрүү», - Мария Дмитриева, корреспондент.

Оттон 2030 сылга диэри бу көрдөрүүнү 70 тыһыынча гектарга тириэрдэр күүстээх сорук турар. Күн бүгүн улуус барыта ыһыыга таҕыста. Онон бааһыналарга билиһин үлэ күргүөмнээхтик барар. Сири таҥастааһын, ыһыы тэтимирэр. 

Сахаяна Павлова, СӨ Тыа хаһаайыстыбатын миниистирин солбуйааччы: "Туораахтаах култуурана 12,4 тыһыынча гектарга ыһыахтаахпыт, ону тэҥэ сүөһү эбии аһылыгын 32,4 тыһыынча туонна гектар, хортуоппуй 6,4 тыһыынча гектар уонна оҕуруот аһын 1,4 гектар иэннээх сиргэ ыһыахтаахпыт".

Туораахтаах култуураны ыһыы бэс ыйын саҥатыгар түмүктэниэҕэ, оҕуруот аһын олордуу эмиэ бу кэми баттаһа үмүрүйүө. Оттон сиик саптарыы ыам ыйын бастакы күннэригэр оҥоһуллубута.