Дьокуускайга көҕөрдүү үлэтэ саҕаланна

Оҕуруот аһын рассадалара номнуо ситэн улаатан тураллар, оҕурсу, помидор, биэрэс, баклажан, тыква, хаппыыста, сүбүөкүлэ. Сибэккилэр эмиэ хайыы-үйэ ситэн дьэрэкээн өҥнөрүнэн туланы киэргэтэллэр. Манна петуния хас да көрүҥэ, бархатцы, титония, лилия, дельфиниум, лабелия, алиссум онтон да атын кэрэ сибэккилэр үүнэн чэлгийиэхтэрэ. Арктикатааҕы  агротехнологическай университет теплицэтигэр биирдиилэн дьон, итиэннэ дьиэ кэргэнинэн кэлэн атыылаһаллар.

Александра Арбыкина, Дьокуускай олохтооҕо: «Барытын олордобун. Хаппыыста уонна кабачогум рассаадата кыаыйан тахсыбата. Бастакыбын кэллим».

Күннэтэ үүнээйилэри университет преподавателлэрэ, наука кандидаттара салайааччылаах  бөлөх көрөр-истэр, бүөбэйдиир. Быйыл сыллата буоларын курдук уонунан тыһыынча рассаданы олортулар. Онтон улахан аҥара сибэкки, онтон хаалбыта оҕуруот аһын рассадата буолар.

Айысхаана Васильева, агрономия кафедратын старшай преподавателэ: «40 тыһ. 25 көрүҥ сибэкки рассаадатын олортубут. 20 тыһ. 9 көрүҥ оҕуруот аһын рассадатын. Улахан атыыларбыт ыам ыйын маҥнайгы күнүттэн саҕаламмыта. Олунньу ыйтан олордон саҕалыыбыт рассааданы уонна муус устарга теплицэҕэ көһөн киирэбит».

Дьокуускай көҕөрдүүтүгэр куорат араас тэрилтэлэрэ, үөрэҕин кыһалара күүс-көмө буолаллар, бу маннык үүнээйи рассадаларынан  хааччыйаллар. Университет сыллата  куораты көҕөрдүүгэ ылсан үлэлэһэр. Хотугулуу-Илиҥҥи федеральнай университет ботаническай саадыгар үлэ эмиэ күргүөмнээхтик барар. Манна научнай үлэни таһынан нэһилиэнньэҕэ анаан араас үүнээйилэри, талах мастары, сэппэрээктэри олордон атыыга таһаараллар.

Розалия Докторова, ХИФУ ботаническай саадын салаатын салаайааччы: «Биһи килиимэппитигэр сөптөөҕү олордобут. Бу от-мас кыһыммытыгар кыстаан турар».

Дьокуускай үрдүнэн тулалыыр эйгэни көҕөрдүү үлэтин бараҕай былаана олоххо киирбитэ быйыл 5 сыла. 2021 сыллаахтан буоларын курдук, дьэрэкээн сибэккилэри эрэ буолбакка, өр сылга үүнэр сэппэрээктэри, талахтары, мастары олордууну киллэрбиттэрэ. Көҕөрдүү  чэрчитинэн, быйыл киин куоракка сүүһүнэн тыһыынча сибэкки олордуохтара.