Умнас өрөспүүбүлүкэтээҕи суол 63 килэмиэтирэ. Уулаах Аан нэһилиэгин таһыгар уопсайа 2км70миэтэрэ уһуннаах суол өрөмүөнэ ыытылла турар.Рик Автодор тэрилтэ Хаҥаластааҕы салаатын үлэһиттэрэ үлэни сүрүннүүллэр. Бастаан утаа суол оннун тэҥнииллэр, асфаал уурулларыгар толору бэлэмнииллэр. 

Күннэтэ хас даҕаны улахан кыамталаах тиэхиньикэ суолу тэҥниир. Айан-сырыы хааччахтамматын инниттэн суол аҥарын сабан үлэлииллэр. Ол курдук икки өттүттэн үлэһиттэр хардары-таары туран массыыналары утары суолга аттаран уочаратынан таһааралллар. Дмитрий Неустроев суол тэрилтэтигэр геодезиһынан үлэлээбитэ 4 сыла. Кини бырайыагы олоххо киллэрэр эппиэтинэстээх сүрүн үлэлээх.

Дмитрий Неустроев, "РИК-Автодор" тэрилтэ геодезист үлэһитэ: «Бу кэнниттэн икки бүк аспаал ууруллар. Бастакыта 7 см, үөһээтэ 5 см. Манна грейдер, каток уонна ресайклер».

Хаҥалас улууһугар мантан сайын  Уулаах Ааҥҥа, Өктөмҥө уонна Покровскайга нэһилиэк иһигэр баар суоллары өрөмүөннүөхтэрэ. Өрөмүөн үлэтэ манна бу учаастакка бэс ыйыгар диэри салҕаныаҕа. Бэлэмнэнии үлэтэ түмүктэммитин кэннэ аспаалы тэлгиэхтэрэ.

Александр Малых, өрөмүөннэнэр учаастак маастара: «На данный момент у меня работают 22 человека. Это не полностью развернутый участок. Через неделю, когда будет готово не менее 1,5 км холодной регенерации, поставим уже асфальт, потому что сроки уплотнения холодной регенерации от 3 до 7 дней».

Умнас суолугар өссө Владимировкаттан Табаҕаҕа диэри, ол эбэтэр 20 килэмиэтиртэн 28 диэри учаастакка, ону тэҥэ 37-42 км диэри капитальнай өрөмүөн барыаҕа. Дьокуускайы уонна Өлүөнэ күргэтин кытта ситимниир 4 балаһалаах суолу оҥоруу 2028 сылга диэри ыытыллара былааннанар. Ону тэҥэ быйыл өрөспүүбүлүкэ улуустарыгар уопсайа 75 усталаах км суолу саҥардыахтара.

Гаврил Окороков, СӨ суол салалтатын суол хаһаайыстыбатын салаатыгар сүрүннүүр эксперэ: «11 эбийиэктээхпит, Амма улууһугар, Өймөкөөҥҥө, Лиэнскэйгэ, Намҥа, Уус-Алдаҥҥа, Чурапчыга, Булуҥҥа уонна Хаҥаласка».

Суол үлэлэригэр быйыл 1 млрд солк тахса үп көрүллэн турар.