Саха сиригэр Оһуохай күнүн бэлиэтээтибит
Бу бэлиэ күн Өрөспүүбүлүкэ үрдүнэн хас биирди улууска нэһилиэккэ, дьон сэргэ тоҕуоруһа мустан оһуохайдаата.
Саха норуотун биир санааҕа түмэр Оһуохай, болуоссакка үгүс киһини түмтэ. Саха дьоно-сэргэтэ, эдэр ыччат бары биир санаанан түмсэн оһуохайы оройуттан туттулар.
Үгэс быһыытынан оһуохай күрэҕин түмүгүн таһаардылар. Быйыл "Куйаар далай түһүлгэ" күрэх кыайыылааҕынан Таатта улууһуттан сылдьар, эдэр оһуохай этээччи Иван Иванов буолла. Кини оһуохайынан утумнаахтык 5-с кылаастан дьарыктанар.
Иван Иванов, "Куйаар далай түһүлгэ" күрэх кыайыылааҕа: «Биһиги күрэхтэһэммит ыччаттары кытта тэҥҥэ оһуохайдааммыт Өрөспүүбүлүкэ "Куйаар далай түһүлгэтин" Сергей Васильевич Местников тэрээһининэн ыытыллар үтүө түһүлгэҕэ кыайыы аартыгын, кыайыы дьолун билэн турабыт».
Оһуохай саха норуотун төрүт култууратын, сиэрин-туомун илдьэ сылдьар төрүт үнкүүбүт буолар. Улуус, түөлбэ аайы оһуохай араастаһар. Күн бүгүн Саха сиригэр оһуохай түмсүүтэ төрүт үгэспитин сайыннарыыга элбэх үлэни ыытар.
Александр Данилов, "Оһуохай" түмсүү салайааччыта: «Саха сиригэр үс аар дархан этээччи баар тыыннаах уонна 19 дархан этээччи. 125 үтүөлээх этээччи баар. Саха сиригэр 600-кэ дэриэбинэ баар, ол барытыгар биир оһуохайдааччы баар буолуохтаах диэн биһиги үлэлии сылдьабыт».
Төрүт үҥкүүнү үйэлэртэн илдьэ кэлэн кэлэр кэнчээригэ тиэрдэр ытык иэспит буолар. Оһуохай күнэ үөрэх дьылын түмүктүүр күнүн-дьылын кытта дьүөрэлэһэр. Өрөспүүбүлүкэ үрдүнэн хас биирди үөрэх кыһатыгар, оҕо уһуйааныгар тиһэх чуорааннарын оһуохайынан түмүктүүллэр.
Сергей Местников, СӨ быраыбыытылыстыба бэрэссэдээтэлин солбуйааччы: «Кыттааччы ахсаана элбээн иһэрэ киһини үөрдэр. Бу Оһуохай күнэ биллэриллиэҕиттэн оһуохай тула кэпсэтии, сайдыы үлэтэ ситимнээхтик ыытыллан биһиги төрүт үгэспит оһуохай сайдан иһэрин туоһулуур».
Оһуохай күнэ быйыл үһүс сылын ыытыллар. Сомоҕолоһуу оһуохайын саргылаах түһүлгэтэ киин куоракка эрэ буолбакка, бүтүн Саха сирин хас биирдии улууһугар дьону-сэргэни түмтэ.
