Саха сиригэр хаһаайыстыбалар сайыҥҥы ыамҥа киирэр соруктаах сайылыкка көһөллөр

Сайылыкка киэһээҥҥи ыам түбүгэ. Ыанньыксыттар ынахтарын биирдиилээн уочаратынан киллэрэллэр. Хаҥалас улууһун Бөртө сылгы собуотун хаһаайыстыбата 3 сайылыгынан тахсар. Бу Уу Көхсө диэн ааттаах ферма. Раиса Борисова ыанньыксытанан үлэлээбитэ 40 тахса сыл буолла. Уопуттаах үлэһит түргэн-тарҕан туттуулаах, 42 ынаҕын күҥҥэ иккитэ ыыр.

Раиса Борисова, Уу Көхсө ферматын старшай ыанньыксыта: «Биир ынах уонтан тахска киилэни биэрэр. От үүнэ илик. Саамай элбээбитэ 15-20 игин буолар».

Уу Көхсүгэр 130 тахса ынах баар. 3 ыанньыксыт 40-тан тахса ынахтаах. Онтон хаһаайыстыба үрдүнэн 400 ыанар ынах баар. Улахан аҥардара 77 бырыһыаннара төрөөн тураллар. Билигин хойутаан төрөөччүлэр уочараттара, күннэтэ биирдии, иккилии ынах төрүүр. Улахан Аан хаһаайстыбата сыллата ыам ыйын саҥата эрдэ сайылыкка тахсар үгэстээх. Быйыл даҕаны ыам ыйын 5 чыыһылатыгар тахсыбыттара.

Ульяна Семёнова, "Бөртө" сылгы собуотун биригэдьиирэ: «Эрдэ тахсарбыт ынахтар мэччийэн салгыҥҥа көхсүлэригэр үчүгэй, ууланалларыгар. Дьоннорбут да сөбүлүүллэр эрдэ көһөллөрүн».

Ньирэйдэри уопсайа 310 төбөнү халлаан сылыйбытын кэннэ 20 чыыһыла диэки көһөртөөн аҕаллылар. Бу Уу Көхсүттэн чугас ыаллыы сытар Куоһаҕас сайылык ньирэйдэрэ. Кырачааннар саамай улааппыттара иккис ыйыгар барда. 

Ньирэй саҥа төрөөтүн кытта 5 суукка ийэтин эмэр, салгыы арааран суосканан үүт биэрэллэр. Үүтү тиэйэр массыына күҥҥэ иккитэ 3 сайылыгынан ыаммыт үүтү хомуйан сыахха аҕалар. Билигин күөх от ситэ үүнэ илик буолан күҥҥэ 2,5 туонна үүтү ыы олороллор. Мунньуллубут үүтү ытыйан сүөгэй оҥорон бэлэмнииллэр.

Анна Максимова, сыах оператора: «Элбээбитэ биэскэ тиийэр сыата, ол гынан баран 4,6-4,8 син биир буолар».

Күҥҥэ маннык 400 гр 300-кэ кэриҥэ сүөгэйи олохтоох нэһилиэнньэҕэ, улууска уонна куоракка маҕаһыыннарынан тарҕаталлар. Үүт аһы астыыр туспа сыахтарыгар хас да көрүҥ үүт бородууксуйатын бэлэмнииллэр.