Сааскы халаан хоромньута суох ааһарын туһугар бары күүһү ууран үлэлииллэр

Тулагы-Киллэм нэһилиэгин олохтоох дьаһалтата ууга барыах кутталлаах ыаллары кэрийэн, сэрэтии үлэтин ыытар. Бүгүн сүрүн болҕомто Капитоновкаларга уурулунна. Манна аҕам саастаах дьон, хороҕор муостаахтары иитэр үгүс ыал олорор. Төрүт олохтоох Докторовтар дьиэ кэргэн сыллата хас ыам ыйын аайы ууну долгуйа күүтэллэр.

Алексей Докторов, Тулагы-Киллэм нэһилиэгин олохтооҕо: «Сыл аайы маныаха диэри кэлэр. Ынахтарбытын уу кэллэҕинэ онно илдьэбит».

Чахчы, уу таһыма үрдүүр түгэнигэр  ынах-сүөһүнү үрдүк сиргэ таһаарыы инникки күөҥҥэ. Холобура, бу Капитоновкаҕа икки улахан бааһынайдар уонна үгүс кэтэх хаһаайыстыбалар бааллар. Ыксаллаах быһыы-майгы түгэнигэр олохтоохтор тугу гыналларын дьаһалта үлэһиттэрэ өйдөтөн санаталлар.

Сыллата бу эҥэрдэргэ былдьаһыктаах кэмнэр үүнэллэр. Малы-салы үөһээ таһаарыы, олбуор иһин хомуйуу. Аҕам саастаах дьоҥҥо бу биллэн туран ыарахаттарадаах ол иһин исписэлиистэр кырдьаҕастарга сүрүн болҕомтолорун уураллар.

Любовь Баишева, Тулагы-Киллэм нэһилиэгин олохтоох дьаһалтатын исписэлииһэ: «Дьоҥҥо уу кэллэҕинэ ханна баралларын кэпсиибит, тугу илдьэ баралларын уонна кыра памятка хаалларабыт. Манна 100-кэ ыаллар бааллар».

Күн бүгүн тустаах нэһилиэккэ 4 быстах кэмҥэ олорор пууннар оҥоһулла сылдьаллар. Тулагы бэйэтигэр Сыырдаахха, Киллэмҥэ уонна Капитоновка култуура кииннэригэр ПВР-дар тэриллинниллэр. Манна медпуун, итии ас барыта, кыра оҕолоох дьоҥҥо усулуобуйа барыта тэриллэр.

Егор Попов, «Тулагы-Киллэм» МТ баһылыга: «Социальнай үлэһиттэри кытта кэпсэтэн, сытар ыарыһах кырдьаҕас дьоннорбутун кыаллар буоллаҕа куоракка көһөрөр курдук. Биһи күүскэ бэлэмнэнэбит».

Сааскы халааны көрсөргө киин куорат уокуругун бары сулууспалара, муниципальнай тэриллиилэрэ бары күүһүрдүллүбүт эрэһиимҥэ киирдилэр.