Бүгүҥҥү күҥҥэ Саха сирин ойууругар 1 баһаар Мэҥэ-Хаҥалас улууһугар баар

Бүгүҥҥү күҥҥэ Саха сирин үрдүнэн ойуур фондугар биир баһаар баһаар. Мэҥэ-Хаҥалас улууһун сиригэр 2,6 гектар сиргэ ойуур умайар. Ону тэҥэ Дьокуускай эргин арыыга 6 гааҕа умайыы бара турар. Өрүһүнэн суол суох буолан умулларыы барбат, салҕыы тарҕанар, итиэннэ нэһилиэнньэлээх пууҥҥа кэлэр куттал суох. Регионнааҕы диспетчерскай сулууспаҕа уопсайа 34 камера баар, Саха сирин бары улуустарын кэтээн көрөллөр. 

Пётр Терентьев, регионнааҕы диспетчерскай сулууспа салайааччыта: «Күн саҕаланыаҕыттан биир ойуур баһаара баар Мэҥэ-Хаҥалас оройуонугар. Баһаар умулларыытыгар 19 киһи уонна 4 тиэхиньикэ үлэлии сылдьар. Уонна куорат территориятыгар биир ходуһа баһаара баар».

"Авиалесохрана" Дьокуускайдааҕы салаатыгар 10 бөлөх баар, алтата - десантнай, түөрдэ - парашютнай бөлөх. Күн ахсын базаларыгар үлэһиттэр үөрүйэхтэрин  дьарыктыыллар, парашюту таҥыыга эрчиллэллэр. Үөһэттэн түһүү биллэн турар үгүс эппиэтинэһи, болҕомтону уонна сэрэхтээх буолууну эрэйэр.

Николай Копырин, "Авиалесохрана" Дьокуускайдааҕы салаатын сүрүннүүр летчик-кэтээччитэ: «Биһи отделениябытыгар эбии штатка көрөннөр эбии үлэһиттэри ылаттабыппыт. Бары үөрэхтэрин ааһан, медосмотр ааһан десантник-пожарный идэни ылбыттара, сорохторо парашютист-пожарный идэтигэр үөрэнэн билигин бэлэм олоробут».

Ойуур баһаардарын сезона саҕаланан, "Авиалесохрана" тэрилтэтин байыастара тыаҕа ойуур баһаардарын умулларыыга аттаныахтара. Баһаардарга туттуллар наадалаах тэрил, сэбиргэл, техникэ барыта бэлэм. Тэрилтэҕэ нэһилиэнньэ дьарыктаах буолуу кииниттэн анал байыаннай дьайыы кыттыылаахтара кэлэн үлэ-хамнас туһунан билсэллэр. 

Алексей Цой, "Авиалесохрана" Дьокуускайдааҕы салаатын парашютнай-десантнай баһаарынай сулууспатын инструктора: «СВО бэтэрээннэригэр үлэбитин көрдөрдүбүт уонна ханнык должность баарын билистилэр».

Ыам ыйын 8 күнүттэн ойуур баһаардарын кэмэ саҕаланыаҕыттан уопсайа 5 баһаар таҕыста. Маныаха быйыл сайын сүннээн кураан сайын буолан баһаар тахсар куттала улахан. Сүрүннээн соҕуруу-илин уонна киин улуустарга. Сайын аайы Саха сиригэр мөлүйүөнүнэн гектар ойуур умайар. Маныаха сэрэтии үлэтин, чуолаан рейдэлэри ыытыы көдьүүстээх.

Владимир Иванов, ойууру харыстааһын, чөлүгэр түһэрии департаменын салайааччытын солбуйааччы: «Билиҥҥи кэмҥэ рейдэлэр бара тураллар. Дьону сэрэтиэ этибит, ойуурга уот отторго сэрэхтээх буолалларын уонна хонтуруола суох өртөөһүн бобуллан турар, ол туһунан уголовнай уонна административнай эппиэтинэс баарын сэрэтэбит».

Ааспыт сыл баччаларын кытта тэҥнээтэххэ баһаар аҕыйах. Быйыл баһаары умулларыыга киинтэн уонна өрөспүүбүлүкэттэн 5,5 миллиард үп көрүлүннэ.