Анал байыаннай дьайыы кыттыылаахтарыгар көмө тиһигин быспакка барар

Сайсары уокуругар "Боевые шелкопряды Якутии" уопсастыбыннай түмсүү салаата ааспыт сылтан аһыллан үлэлиир. Манна волонтердар мустан анал байыаннай дьайыыга сылдьар уолаттарбытыгар наадалаах таҥаһы-сабы тигэллэр, сиэккэ баайаллар, харысхал оҥороллор. Күннэтэ 20-кэ киһи, сүрүннээн пенсионердар кэлэн күүс-көмө буолаллар.

Раиса Горохова, "Боевые шелкопряды Якутии" түмсүү Сайсары уокуругунааҕы салаатын салайааччы: «Разведчиктарга уонна снайпердарга аналлаах көстүүм айбыппыт».

Манна биир сыл иһигэр тыһыынчаттан тахса сиэккэни баайан, сүүһүнэн байыаннай көстүүм тигэн кэллилэр. Тикпит таҥастара утары баран иһэр, ону тэҥэ сакаастар киирэллэр.  Онон түмсүүгэ өрөбүлэ суох күн солото суохтар. Гуманитарнай көмөнү анал байыаннай дьайыыга тиэрдии хас нэдиэлэ ахсын тэриллэр. Билигин быыһык кэмҥэ таһаҕаһы хивустар көмөлөрүнэн Аллараа Бэстээххэ ыыталлар.

Георгий Куркутов, «Вместе к Победе» хамыыһыйа өрөспүүбүлүкэтээҕи ыстаабын салайар киинин салайааччыта: «Сахафармация көмөтүнэн анал байыаннай дьайыы медвзводтара, подразделениялар көрдөһүүлэринэн чопчу испиэһэгинэн эмп ыытан эрэбит. Биһиэхэ өрүс үлэһиттэрэ көмө буоллулар».

Анал байыаннай дьайыы кыттылаахтарыгар салалта таһымыгар өйөбүл салҕанан барар. Дьокуускайга "Якутия - Земля Героев" каадырдары бэлэмниир бырагырааманы бүтэрбиттэр бэйэлэрин бырайыактарын көмүскээтилэр. Уопсайа 24 анал байыаннай дьайыы бэтэрээнэ олох-дьаһах араас хайысхатын сайыннарыыга бэйэтин көрүүтүн билиһиннэрдэ.

Михаил Ан, "Якутия - Земля Героев" программа выпускнига: «Саха өрөспүүбүлүкэтин сайдарын туһугар, дьон-нэһилиэнньэ куттала суох буолуутугар бэйэбит күүспүтүн уураммыт үлэлиэхпит. Манна үөрэнэн ылбыт билиилэрбитин Саха өрөспүүбүлүкэтэ уонна Арассыыйа сайдарын туһугар күүскэ үлэлиэхпит».

Курсаннар сыл устата быраабыталыстыбаттан сыһыарыллыбыт наставниктарын кытта чинчийэр үлэни ыыттылар. Каадыр бырагырааматын бүтэрбиттэр муниципальнай биитэр судаарыстыбаннай сулууспаҕа үлэлэрин салҕыахтара.

Алексей Григорьев, РФ Дьоруойа: «Биһиги сэриигэ сылдьыбыт уолаттар бойобуой уопуппутун үллэстэрбитигэр уонна үүнэр көлүөнэттэн элбэх патриот оҕо тахсарыгар баҕа санаалаахпыт».

Ил Дархан көҕүлээһининэн олоххо киирбит үөрэх барыла салҕанара күүтүллэр.