45 сиргэ уот туруута баара бэлиэтэнэр

Күрдьэх, сүгэ сытыыланар. Ойуур баһаардарыгар туттуллар наадалаах тэрил, сэбиргэл, тиэхиньикэ бүтэһик бэлэмнэниитин ааһар. Сотору кэминэн "Авиалесоохрана” тэрилтэтин байыастара тыаҕа ойуур баһаардарын умулларыыга аттаныахтара. Тохсунньу-олунньу ыйдартан саҕалаан баһаар кэмин көрсө туһааннаах тэрээһиннэр ыытыллан бараллар. 

Алмаз Попов, "Авиалесоохрана" Дьокуускайдааҕы салаатын десантнай-баһаарынай хамаандатын инструктора: "Ойуур баһаарын кэмигэр күүскэ бэлэммит. Холоон көрөр дьырыгы барытын аастыбыт. Билигин туттар тэриллэрбитин бэлэмниибит. Үлэҕэ бэлэммит". 

Күн ахсын базаларыгар үлэһиттэр үөрүйэхтэрин эрчийэллэр, парашюту таҥыыга эрчиллэллэр. Үөһэттэн түһүү, биллэн турар, үгүс эппиэтинэһи, болҕомтону уонна сэрэхтээх буолууну эрэйэр.

Николай Копырин - "Авиалесоохрана" Дьокуускайдааҕы салаатын сүрүннүүр летчик-кэтээччитэ: "Үлэһиттэрбит бары сааскы холоон көрүүнү уонна быраас көрүүтүн барытын ааһан олороллор. Быйыл биһиги салаабытыгар 11 үлэһити эбии көрдүлэр.Онон өссө күүһүрдүбүт ". 

"Авиалесоохрана" Дьокуускайдааҕы салаатыгар уон бөлөх баар, алтата  десантнай, түөрдэ парашютнай бөлөх. Ону тэҥэ 5 кэтээччи-лүөччүк баар. Эбии саҥа үөрэнэн кэлбит лүөччүктэр стажировка ааһыахтаахтар.  

"Ойуур баһаардарын кэмэ чугаһаата. Номнуо бастакы уот туруулара бэлиэтэннилэр диэн ыксаллаах быһыы-майгы Саха сиринээҕи салалтата иһитиннэрэр. Күн бүгүн 45 сиргэ уот баара биллэр", - Татьяна Николаева, корреспондент.

Ойуур баһаардарын кытта үлэ бырабыыталыстыба тус болҕомтотугар сылдьар. Маныаха быйыл сайын  кураан сайын буолан баһаар тахсар куттала улахан.

Борис Кручинин,  "Авиалесоохрана" Дьокуускайдааҕы салаатын авиационнай звенотун хамандыыра: "Соҕуруулуу-илин хайысхаҕа уот туруута элбэх буолуон сөп диэн сабаҕалыыллар. Итини сэргэ саамай куйаас ыйдарга, бэс уонна от ыйдарыгар, киин улуустарга ойуур баһаара элбиэн сөп диэн сабаҕалыыллар". 

Сайын аайы Саха сиригэр мөлүйүөнүнэн гектар ойуур умайар. Маныаха сэрэтии үлэтин, чуолаан рейдэлэри ыытыы көдьүүстэх.

Роман Мухин, СӨ экология министиэристибэтин ойууру кэтээн көрөр салаатын салайааччыта: "Ыам ыйын өрөбүллэриттэн саҕалаан рейдэлиир үлэбитин саҕалаабыппыт. Күн бүгүн 158 кэрийэн көрүү оҥоһулунна. 800-чэкэ киһи сэрэтии ылла. Итини сэргэ 8 административнай боротокуол оҥоһулунна". 

Баһаары умулларардааҕар сэрэппит ордук, баай хара тыаны харыстыаҕыҥ.