Кыра өрүстэргэ хамсааһын бэлиэтэнэр
Олохтоохтор устууларын көрөбүт. Манна Амма нэһилиэгин аннынан эбэ уста сытара көстөр. Бэрт түргэнник хамсыыр, мууһа хойуу. Оройуон киинин туһаайыытынан уу таһыма 2,5 миэтэрэҕэ тэҥнэһэр. Манна кутталлаах кирбии 9 миэтэрэ. Бу муус кэбирээбит сирдэринэн быстах сиргэ устарын исписэлиистэр этэллэр. Оттон эбэ дьиҥ эстиитэ ыам ыйын 7-8 күннэригэр күүтүллэр.
Саха сирин өрүстэрэ ити курдук кыралаан хамсаатылар. Ол курдук билигин Өлүөхүмэ улууһугар Тээнэ өрүс бара сытар. Оттон Өлүөнэ Иркутскай уобаласка Уус-Кут оройуонун туһаайыытынан устар. Өлүөнэ, Алдан, Бүлүү өрүстэргэ уу таһыма тахсар.
Людмила Мурашко, Дьокуускайдааҕы гидрометсулууспа салайааччыта: “Сорох сирдэргэ ырбыы тахсан мууһу көтөхтө. Билигин улахан болҕомтону Тээнэ, Чаара, Амма өрүстэргэ уурабыт. Манна биһиги түүннэри-күнүстэри иһитиннэриини хомуйар пууннарбыт турдулар”.
Ил Дархан Айсен Николаев халааны сэрэтии уонна туоратыы өрөспүүбүлүкэтээҕи хамыыһыйатын мунньаҕын тэрийдэ. Саха сиригэр үрдүкү бэлэмнээх кэм олохтоммутун иһитиннэрдэ. Күн бүгүн өрөспүүбүлүкэ муус барыытыгар толору бэлэм. Ил Дархан хонтуруолу итиэннэ нэһилиэнньэни сэрэтиини күүһүрдэри сорудахтаата.
Дмитрий Садовников, СӨ Бырабыыталыстыбатын бэрэссэдээтэлин бастакы солбуйааччы: “Сүөһүнү, сылгыны сөпкө дьаһайыыны, үрдүк сирдэргэ таһаартааһыны, нэһилиэнньэни быстах кэмҥэ куоттарар сирдэри кэмигэр үлэлэтэри сорудахтаата”.
Халаан уутуттан куталлаах кэм икки түһүмэҕинэн барыаҕа. Бастакы Өлүөнэ, Алдан, Амма уонна Таатта өрүстэргэ. Оттон иккис түһүмэх хотугу өрүстэри хабыа. Ол курдук Халыма, Дьааҥы уонна Индигир. Уопсайа 17 тыһыынча киһи халааҥҥа үлэлиэ. Маны сэргэ туһааннаах тиэхиньикэ, куотар сирдэр, авиация бэлэмнэннэ. Туһааннаах биэдэмистибэлэр номнуо миэстэтигэр үлэлииллэр. Ол курдук Амма, Алдан өрүстэргэ бөлөхтөр кэтииллэр.
"Муус устар кэмигэр балаһыанньаны кэтииргэ уонна ыксал тирээтэҕинэ дьону куоттарыыга Арассыыйа ыксаллаах быһыы-майгы министиэристибэтин авиацията туһаныллыа. Маныаха МИ-8 икки бөртөлүөт номнуо саха сиригэр кэлэн турар. Уопсайа өрүс ыраастанарыгар эппиэттээх 9 биэдэмистибэ исписэлиистэрэ үлэлиэхтэрэ. Маны сэргэ харыы тахсар түһэнигэр диэн быһыыр бөлөҕү сэргэ дэлби тэптэрээччилэр бөлөхтөрө Дьокуускайтан айаннаата”, - Мария Дмитриева, корреспондент.
