Кыайыы ырыалара бэтэрээннэр тэлгэһэлэригэр дьиэрэйэр

Аҕа дойду бэтэрээнэ Бүлүү улууһуттан төрүттээх 103 саастаах Семен Иванович Колтовский Кыайыы күнүн көрсө элбэх ыалдьыттардаах. Өрөспүүбүлүкэ,  куорат, уокурук салалатыттан кэлэн эҕэрдэ тыл бастыҥын этэллэр. Төһө да сааһа ырааттар ытык кырдьаҕас дьиэтин иһигэр этэҥҥэ сылдьар. Семен Иванович Япония сэриитин кыттыылааҕа. Сэрии кэнниттэн ис дьыала уорганнарыгар таһаарыылаахтык үлэлээбитэ.

Мария Колтовская, Семен Колтовский кыыһа: "Милиция сулууспалыыр буолан наар үлэтигэр буолара. Ол эрэн биһиэхэ куруутун бириэмэ булан болҕомтотун уурара, иитэрэ". 

Семен Ивановиһы чиэстээн кини олорор дьиэтин тиэргэнигэр "Олбуорунан ыллыыбыт" аахсыйаны сыллата ыыталлар. Бэтэрээҥҥэ анаан сэрии кэминээҕи, ону тэҥэ Улуу Кыайыыга анаммыт ырыалары бэлэх ууннулар.

Күн бүгүн Сахабыт сиригэр 7 сэрии бэтэрээнэ хаалла. "Олбуорунан ыллыыбыт" аахсыйа уопсастыбаннаһы,ыччаты уонна саастаах көлүөнэни холбуур.

Давид Федотов, ИДьМ тус састаабын кытта үлэҕэ салалтатын салайааччытын солбуйааччы: "Кини үйэтин сулууспаҕа анаабыта. Онон бу бүгүн эҕэрдэлии кэлэн турарбыттан сүрдээҕин үөрэбин". 

Кэнсиэри көрө кыралыын-улаханныын элбэх киһи кэллэ. Семен Иванович олорор дьиэтин подьеһыгар тустаах сурук иилиллэн турар.

Егор Тимофеев, үлэ бэтэрээнэ: "бу маннык үчүгэй кэнсиэри оҥороллоро аһары үчүгэй. Билиҥҥи көлүөнэ бэтэрээннэри убаастыылларын көрөн биһиги олус үөрэбит".  

Бу күн ону тэҥэ иккис бэтэрээни Мартын Герасимович Григорьевы эмиэ чиэстээтилэр. Сунтаар улууһуттан төрүттээх 101 саастаах Мартын Герасимович 18 эрэ саастааҕар 1943 сыллаххха сэриигэ ыҥырыллан барбыта. Дойдутугар эргиллэн кэлэн Комбыт сэбиэдиссэйинэн үлэлээбитэ. Ытык кырдьаҕас киниэхэ ылланар ырыаларын таһырдьа тахсан иһиттэ, бар дьоҥҥо алгыс тылын эттэ. 

Мартын Григорьев, Аҕа дойду сэриитин бэтэрээнэ: "Доруобай буолуҥ, үөрэ-көтө олоруҥ".  

Мартын Герасимовичка бэлиэ күн Кытайы милитаристкай Японияттан босхолооһун 80 сылыгар анаммыт кытайтан кэлбит мэтээли туттардылар. 

Евгений Григорьев, Дьокуускай куорат баһылыга: "Бэтэрээннэргэ доруобуйаны баҕарабын. Биһиги, аныгы көлүөнэ дьоно, кинилэри көмүскүү, харыстыы сылдьыахтаахпыт. Хаһан да бу кыайыы туһунан умнуо суохтаахпыт".  

Ийэ дойдубутун көмүскээбит, ыраас халлаан анныгар олорорбутугар олохторун олук уурбут эһэлэрбит хорсун быһыыларын ытыктыахтаахпыт, кинилэр ааттарын үйэтитиэхтээхпит