Дьокуускайга суол өрөмүөнүн үлэтигэр толору киирдилэр

Улахан кыамталаах техника суол оҥоруутун үлэтигэр. Тыраахтар аспаал ууруллуон иннинэ бу курдук  суолу тэҥниир. Айан суола хас да сыл буолан баран быйыл дьэ оннуттан саҥардыллан эрэр. 

Айгылаан Григорьев,  "Дороги Саха" ХЭТ учаастак салайааччыта: "Былырыын Дежнев аатынан уулуссаттан Каландаришвилига диэри аспааллаабыппыт. Быйыл салгыы Петровскай аатынан уулуссаҕа диэри оҥоруохпут. Маныаха урукку аспаалын ылан, 1 миэтэрэ хаһан баран оҥоробут".

Суол оҥоруутун тэҥинэн гаас уонна ууну аһардар турбалары уларытыы үлэтэ эмиэ барар.

 Олег Григорьев бу эбийиэккэ хаһыс да күнүн үлэлии сылдьар. Сарсыарда 9 чаастан үлэ тохтоло суох барарын  кэпсиир.

Олег Григорьев,  "Сахатранснефтегаз" тэрилтэ үлэһитэ: "Суол оҥоруохтарын иннинэ гаас турбатын уларытан бэлэмнээн кээһэбит. Ол кэннэ суолу аспааллыыллар, кытыы өттүлэригэр тротуар оҥоруохтара".

Суол тупсуута - олох хаачыстыбатын мэктиэтэ. Кэнники 7 сылга уларыйыы харахха быраҕыллар. Бу барыта дойду таһымыгар ыытыллар үлэни кытта сибээстээх.

"Дьокуускайга ыытыллар суол өрөмүөнүн үлэлэрэ Дойду президенэ Владимир Путин көҕүлээбит "Олоххо дьаһахха аналлаах инфраструктура" национальнай бырайыак чэрчитинэн ыытыллар. Быйыл бу бырайыагынан куоракка    8 суол   саҥардыллыаҕа, уопсай уһуна 7 килэмиэтир", - Петр Дьяконов.  

Суол оҥорооччулар соруктара  - үлэни кэмигэр түмүктүүргэ уонна аспаал үөһээҥҥи араҥатын хаачыстыбалаахтык уурарга туруулаһаллар.

Күн бүгүн Ойуунускай уонна Петровскай уулусса быһа охсуутугар 10 улахан тиэхиникэ, 15 суол үлэһитэ, 5 ИТР үлэлии сылдьаллаллар.