"Олбуорунан ыллыыбыт" аахсыйа саҕаланна

Аҕа дойду Улуу сэриитин бэтэрээнэ Кирилл Павлов олорор дьиэтин олбуоругар тахсан киниэхэ анаммыт кэнсиэри сэҥээрэр. Оттон Ленинград блокадатын кыттыылааҕа Эрна Яковлева балконтан көрөр. Эрна Иосифовна хорсун быһыы, күүстээх санаа тыыннаах туоһута.  Ырыаһыттар толоруулара бэтэрээннэргэ оччотооҕу кэми, Кирилл Егоровичка бииргэ сэриилэспит доҕотторун, этэрээтин хамандыырын  санатара саарбаҕа суох. 81 сыл анараа өттүгэр ыам ыйын 9 күнүгэр Кыайыы туһунан сураҕы истээт, кинилэр эмиэ бу курдук, үөрүүлэриттэн ыллам ырыаны оройуттан туппуттара.

Бэтэрээн сүрэҕин ордук кырачааннар эҕэрдэлэрэ тутта. Кинилэр бэрт боччумнаахтык "Алеша" тааҥка туһунан ырыаны толордулар. "Тиэргэнинэн ыллыыбыт " тэрээһиҥҥэ үгүс ыччат, оскуола, уһуйаан оҕолоро кэлбиттэр. Онон бэтэрээн Кирилл Павлов кэлэр кэнчээри ыччакка туһаайан баҕа санаатын эттэ.

Кирилл Павлов, Аҕа дойду Улуу сэриитин бэтэрээнэ: "Үөрэнэр кэмҥэ билиини элбэхтик ылыахха наада. Билии босхо бэриллэр, босхо бэриллэр билиини төһө кыалларынан элбэҕи ылыллыахтаах. Оччоҕо өйдөөх киһи, ааҕар киһи, билиилээх киһи уопсастыбаҕа үчүгэй балаһыанньаҕа сылдьар". 

Кирилл Егорович  педагогическай училищеҕа үөрэнэ сылдьан 1944 сыллаахха фроҥҥа ыҥырыллан барбыта. Онон кини сэрии кэмигэр Саха сиригэр сатыылаабыт уот курааны, аас- туор олоҕу, онтон уоттаах сэриини бүтүннүү этинэн-хаанынан билбитэ. Оттон Эрна Иосифовна оччолорго төһө да кыра саастаах буоллар, тыыннаах хаалар туһуттан улахан дьоҥҥо көмө буоларын өйдүүр. Ытык дьоммутун көрсө үгүс киһи тоҕуоруспут. Бу  Кыайыыны уһансыбыт дьоммутугар сүгүрүйүүбүт бэлиэтэ.

Пётр Шамаев, СӨ ыччат миниистирэ: "Төһө кыалларынан оҕолору, ыччаты кытыннараммыт эҕэрдэлэтэбит. Ону бэтэрээннэрбит олус сөбүлүүллэр. Биһиги ытык иэспит буолар ыччакка историяны тириэрдии, оҕолорбут бэтэрээннэри суолдьут сулус курдук туттан улааталларын ситиһии". 

Кирилл Егорович куруутун олоххо көхтөөх сыһыаннаах, уопсастыбаннай тэрээһиннэри көтүппэккэ кыттар. Эдэр ыччакка сүбэтинэн, бэйэтин хорсун быһыыларынан, үтүө суобастаах үлэтинэн-хамнаһынан, өйүнэн-санаатынан  холобур эрэ буолар. Кини тэрээһин кэмигэр Саха сирэ эйэлээх олох түстэниитигэр улахан кылааттааҕын  өссө төгүл тоһоҕолоото. 

"Нэдиэлэ устата “Тиэргэнинэн ыллыыбыт” диэн аахсыйа Аҕа дойду Улуу сэриитин бэтэрээннэрин уонна Ленинград блокадатын кыттыылаахтарын тэлгэһэтигэр дьиэрэйиэ. Бу манна бэтэрээннэр эҕэрдэ тыллары истиэхтэрэ, ыччаты кытта көрсүөхтэрэ, ол кэминээҕи ырыалары истэн дуоһуйуохтара", - Мария Дмитриева, корреспондент.