Өлүөхүмэҕэ Тээнэ өрүскэ муус хамсаата

Саха сирин өрүстэригэр көмүөл мууһа уста илик.  Өлүөнэ эбэбит Иркутскай уобалас сиригэр устар. Манна харыы тахсыбатын туһугар эстэрии үлэтин ыыталлар. Былырыын баччаларга эбэбит мууһа Саха сиригэр номнуо киирбит эбит. Онон быйыл өрүспүт бытааннык эстэн эрэр. Барыллаан аҕыынан бу өрөбүллэргэ кыраныыссаҕа кэлиэхтээх. Маныаха Ленскэйгэ, Өлүөхүмэҕэ уу таһымын кэтээн көрүүнү элбэттилэр.

Пётр Аргунов, Өлүөнэтээҕи уу салалтатын салайааччыта: “Өлүөхүмэҕэ Орто Өлүөхүмэ диэн нэһилиэк аннынан өрүс муус үрдүнэн уста сытар. Оттон Тээнэҕэ муус хамсаан, сууккаҕа 1 миэтэрэ курдук үрдээн, уу таһыма 3 миэтэрэ 28 сантымыатыр буолла. Манна кутталлаах таһым 5 миэтэрэ 50 сантымыатыр”.

Муус устара чугаһаан иһэринэн, өрүстэр туруктарын кэтэбилэ күүһүрэр. Күн-дьыл уларыйа турар, маныаха сөҥүү аҕыйах, сорох сиринэн күүстээхтик тыалырар. Бу күннэргэ сис былыт сылыйыыны уонна араас таһымнаах ардаҕы аҕалыа диэн синоптиктар билгэлииллэр.

Татьяна Маршалик, Дьокуускайдааҕы күнү-дьылы кэтээн көрөр сулууспа салайааччыта: "Арҕаа уонна киин улуустарга быстах ардах түһүө. Оттон хотугуулуу-арҕаа инчэҕэй хаар бэлиэтэнэр. Ыам ыйын 9-10 күннэригэр ардахтаах буолуо". 

Сааскы халлааны сэрэтиигэ Саха сирин өрүстэригэр чуолаан мууһу хараардыы, кэбирэтии үлэлэригэр быйыл 75 мөлүйүөн үп көрүллэн үлэ барда. Маныаха быйыл кыһалҕалаах сирдэри эбии киллэрэн, Ньурба улууһугар Бүлүү өрүскэ аан бастакытын хараардыы үлэтин ыыттылар.

Иннокентий Ким, Ньурба улууһун биир кэлим диспетчерскэй сулууспатын салайааччытын солбуйааччы: "Уопсайа 23 гектары оҥордулар. Үлэ болдьоҕор бүттэ, онон билигин күүтэбит эрэ".   

Ленскэй улууһугар муус ыам ыйын 12 күнүгэр устуо диэн сылыктыыллар, бу ааспыт сылтан 2 хонугунан хойутаан.

"Оттон Дьокуускайга, былырыыҥҥы курдук 3 күн хойутаан, ыам ыйын 17 күнүгэр муус устара күүтүллэр. Уу таһыма үрдүк буолуо диэн сылыктыыллар, оччоҕо харыы тахсар куттала үөскүүр", -Татьяна Николаева, корреспондент.

Алдан, Амма, Бүлүү өрүстэр кэлэр нэдиэлэ бүтүүттүттэн саҕалаан устуохтара. Онтон хоту өрүстэр ый бүтүүтэ. Ыксаллаах быһыы-майгы министиэристибэтин 9 суһал бөлөҕө халааны ыытыыны миэстэтигэр тиийэн кэтиэҕэ.

Иннокентий Андросов, СӨ быыһыыр сулууспатын салайааччы: "Ыам ыйын 5 күнүгэр 1№-дээх суһал бөлөх Ленскэйгэ көтүөҕэ. Ити сэргэ үс бөлөх Таатта, Алдан, Амма өрүстэргэ айанныа".

Өлүөнэ эбэбит мууһа бүгүҥҥү күҥҥэ кыраныыссаттан 900 килэмиэтир тэйиччи Уус Кут анараа өттүгэр уста сытар.